Jýyrda T.Júrgenov atyndaǵy Qazaq ulttyq óner akademııasynyń kınozalynda Ásııa Baıǵojına sheberhanasynyń (4 kýrs «derekti kıno rejıssýrasy» mamandandyrýy) «Súıgendikten» (“Potomý chto lıýblıý”) atty qysqametrli fılminiń kórsetilimi ótti. Derekti kınotýyndyny stýdentter ústimizdegi jyldyń jazynda túsirgen. Túsirilim tobynyń quramynda eki rejısser – Kamılla Ábdeldınova men Kamılla Berdimuratova, admınıstrator – Áıgerim Baqyt, dybys operatory – Qanaı Qoıshyn, dırektor – Baný Ramazanova boldy.
Kınoshyǵarma dóńgelek ústel aınalasynda jınalǵan jastardyń qazaq ulty ókilderi men basqa ult ókilderi arasyndaǵy nekelesý máselesi boıynsha pikir talasýynan bastalady. Jastardyń oılary ártúrli, áńgimeleri qazaq tilinen orys tiline qandaı jyldamdyqpen aýyssa, sol jyldamdyqpen urys, aıǵaı-shýdan birtekti sóılesýge kóshedi. Talqylaý basyna qoıǵan taqyryptary ózekti, sebebi búgingi kúnde basqa ult ókilderi arasyndaǵy mahabbatqa degen kózqaras ózgerýde. «Ol qazaqı mádenıetke jat!» - degen pikirlerdi ǵalamtor jelisinen patrıottyq sezimge toly jigitterdiń jazǵandarynan oqımyz. Nelikten jigitter ǵana? Qyz balalarymyzdyń kóbirek tolerantty bolǵanynan ba, álde, osyndaı taqyrypqa qatysty oı bildirgileri kelmegendikten be? Bul suraqty qoıǵan sebebim: qysqametrli fılmdi qaraý barysynda eki erli-zaıypty jup ózderiniń hıkaıalaryn aıtyp berdi. Fılmdegi erli-zaıyptylar bir úlgi boıynsha tańdap alynǵan – qazaq áıel men orys er adam. Kınotýyndy barysynda stýdentterdiń dóńgelek ústel kezindegi talqylaý juptardyń baıandamalarymen bir yrǵaqta qabyldanǵan. Jastardyń ishinen jigitter konservatıvti, ıaǵnı, birshama ultshyl bolsa, qyzdar kóbinese «júrekke ámir júrmeıdi» degen oıdy ustanǵan.
Birinshi jup – Vasılıı men Jazıra. Ekeýi stýdenttik keshte tanysyp, Jazıra Vasılııdi bir kórgennen-aq «buıra shashty perishte» dep, al Vasılıı Jazırany «rokersha» dep qabyldaıdy. Ekinshi jup – Dana men Sergeı, óner salasynda jumys isteıdi, atap aıtsaq, olar kıno túsirilim tobynyń músheleri. Dana ózin, jubaıyna qaraǵanda, orystanǵan qazaq sanaıdy, - «Kúıeýim qazaqshaǵa sýdaı!», - dep kúledi. Halqymyzdyń ana tilinde sóıle almaıtyny, nemese túsine, bile tura, basqa, shet tilin tańdaýy búgingi kúnde kóp kezdesetin, týǵan tilimizge qatysty eń mańyzdy máselelerdiń biri.
Kınoshyǵarma kúrdeli túrde aralasyp ketken úsh bólikten turady: 1) dóńgelek ústel basynda jınalǵan stýdentterdiń erkin túrde, ımprovızaııa retinde ótken birshama jınalys; 2) erli-zaıyptylardyń árqaısysy kamera aldynda ózin erkin ustap suhbat bere otyra, mahabbatqa degen ózindik kózqarasyn, hıkaıalaryn baıandaıdy; 3) saýalnama, ıaǵnı, kóshedegi jolaýshylardan «basqa ult ókilderi arasyndaǵy nekelesý múmkindigi» jaıly oılarymen bólisýdi fılm avtorlary ótinedi. Qatysýshylardyń jasy, ulty, jynysy ártúrli bolǵanymen, kóbisi – barlyǵy adamnyń ózine baılanysty – degen ustanymmen bólisti. Álbette, fılm keıipkerleriniń esh qysylmaı ashylýy túsirilim tobynyń jumys barysyndaǵy kórsetken kásibıliginde de jatyr. Kınotýyndy aty zatyna saı degen osy: «Súıgendikten», - júrek qalaýymen ómir súrýdi nasıhattaýshy fılm.
