Gúlim hanym, birinshi suraǵymdy mynadan bastaǵym kelip otyr. Ár adam balasy bala kezinen qııalshyl bolyp keledi. Máselen, óskende «mynadaı» adam bolsam eken dep, árkim arman jetegine eredi. Sizdiń osy búgingi kásibińiz bala kezgi armanyńyz ba? Jalpy, bul erekshe óner jolyna qalaı keldińiz? Sol jaıly azdap aıtyp ótseńiz.
Aıtaıyn! Bala kezimnen
armandadym. Mektep qabyrǵasynda júrgennen bastap ánshi boldym, bıshi boldym.
Orkestrda kúıshi de boldym. Mýzykalyq mekteptiń bir jylyn ǵana oqyp, ary qaraı
damyta almadym. Degenmen, ónerge degen qyzyǵýshylyǵym, talpynysym myqty boldy.
Mektepti bitire salysymen qazirgi T.Júrgenov atyndaǵy óner akademııasyna tústim.
Mamandyǵym «Drama, kıno aktrısasy». Oqýymdy bitirgennen keıin osy qýyrshaq
teatry buıyrdy. 1997 jyldan bastap osy jerde qyzmet etip kelemin. Akterlyq
sheberligimdi de damyta tústim.
Bul ortaǵa tez sińisip kete aldyńyz ba? Degenmen, qýyrshaq teatry bólek álem ǵoı. Jumys ornyńyz kóńilińizden shyqty ma?
Jumysymdy qatty unattym. Bul
orta men úshin óte ystyq. Ózimniń ujymymdy da jaqsy kóremin. Qýyrshaqtarymdy
jaqsy kóremin. Tipti súıikti qýyrshaqtarymyz da bar arasynda.
Súıikti qýyrshaq demekshi, ózińizdiń eń janyńyzǵa jaqyn qýyrshaǵyńyzdy atap bere alasyz ba?
Alǵash teatrǵa kelgenimde, N.Orazalınniń
«Aqqus týraly ańyzyn» B.Parmanov atty rejısser qoıǵan bolatyn. Ol qoıylymda men
Gúlsana atty basty keıipkerdiń birin somdaǵan bolatynmyn. Sol eń alǵashqy rólim.
Eń janyma jaqyn qýyrshaǵym da sol.
Sizdiń somdaıtyn rólderińizdiń menińshe, ózara uqsastyqtary bar sııaqty. Máselen, siz únemi erke, kerbez minezdi keıipkerlerdi somdaısyz. Sondaı-aq zertteýimshe, mysyq, túlki sekildi janýarlardyń róli kóbine sizge buıyrady. Sol óz rólderińizdiń tabıǵı minezińizben bir baılanysy bar ma?
Bir ról bir rólge uqsaıdy dep
aıta almaımyn. Mysyq bolsyn, túlki bolsyn pesanyń mazmunyna qaraı olardyń
minezderi de ártúrli bolyp keledi. Jalpy, bizdiń maqsatymyz - jan-jaqty
rólderdi jańǵyrtý. Sondyqtan, biz somdaıtyn árbir ról ózara erekshelenip turady.
Al rólderimniń tabıǵı minezime baılanysyna keletin bolsaq, ııa, rasymen kóbine
jińishke daýysty, erke keıipkerlerdi somdaımyn. Ásirese kishkentaı qyzdardyń róli
maǵan jıi buıyrady. Múmkin, osyndaı rólder shynymen tabıǵatyma jaqyn bolǵannan shyǵar.
Jalpy akter úshin, sahnaǵa shyǵyp óz atyńnan sóıleý bir bólek, al qýyrshaqty sóıletý, qýyrshaqty tiriltý odan da qıyn dep oılaımyn. Qoldyń da ıkemdiligin talap etedi. Bul qıyn óner túrin qalaısha baǵyndyrdyńyz? Qıynshylyqtar kóp bolǵan shyǵar? Álde, ózińizdiń súıikti isińiz bolǵannan keıin de sizge jeńildeý boldy ma?
Eń alǵash kelgen jylymyzda
birinshi qýyrshaqty ıgere bastadyq. Qazirgi tańda professor Maqulbekov Serik
qýyrshaqty júrgizýdi úıretti. Qýyrshaqty bastapqyda meńgerý árıne qıynǵa soqty.
Sol qýyrshaqpen somdaıtyn róldi alyp shyǵý úshin boıymyzǵa biraz ony aldymen
sińdiremiz. Boıǵa sińgennen keıin ony qýyrshaqtyń boıyna taratamyz degendeı.
Iaǵnı, qýyrshaqty tiriltý arqyly onyń obrazyn ashyp, kórermenge jetkizemiz. Árıne ondaı eńbek kóp ýaqytty talap etedi. Ter
tógiledi. Biraq sonyń bárin ózińiz aıtyp ótkendeı, súıikti isiń bolǵandyqtan
jeńip, júzege asyrasyń.
Árıne, bastysy jumysyńa degen mahabbat. Gúlim hanym, qýyrshaq teatry sońǵy kezde jańa ádisti alyp kelgeni bizge málim. Iaǵnı, qýyrshaqpen birge akterdyń da sahnaǵa shyǵýy. Jalpy, bul jańa ádiske sizdiń kózqarasyńyz qandaı?
Jaqsy... Óte jaqsy! Óz basym qoldaımyn.
Teatr jańaryp jatyr. Oǵan tek qýanýǵa ǵana bolady. Al, negizi buǵanǵa deıin de
biz sahnada kórinbegenmen, tek qoldarymyz ǵana jybyrlap jatqandaı bolǵanymen, kez-kelgen akter sekildi bar kúshimizdi jumsap
keldik. Bar bolǵany, shymyldyqtyń ar jaǵynda bolǵandyqtan kórermen basqasha
qabyldaýy múmkin.
Jaqyn arada kórermenge usynylǵaly jatqan «Ana-Jer-Ana» qoıylymyna toqtalǵym kelip otyr. Rejıssermen jumys jaıynda aıtyp ótseńiz. Qandaı erekshelikterin baıqadyńyz? Jalpy, ol kisimen jumys istegen qalaı eken? Kóńilińizden shyǵa ma, degendeı. Qansha degenmen, alǵash jumys isteýlerińiz ǵoı...
Iıa, Dına Qunanbaıqyzymen alǵash
jumys jasaýymyz. Jalpy, jumys barysynda tanysa kele, ol kisiniń qataldyǵyn
kórdik. Talap etetin rejısser. Bizdiń ishki sezimimizdi barynsha ashyp berýdi
talap etedi. Ol kisiniń ádisi de jańa. Stıli de ózgeshe. Sh.Aıtmatovtyń
«Ana-Jer-Ana»-sy kúrdeli dúnıe ǵoı, ózińiz bilesiz. Ondaǵy Tolǵanaıdyń róli
maǵan buıyryp tur. Osy kezge deıin jeńildeý, kóńildi rólderdi somdap úırenip qalǵannan
keıin, muńdy, aýyr ananyń rólin somdaý árıne, ońaıǵa soǵyp jatqan joq. Sol
soǵys jyldaryndaǵy qıynshylyqty, joqshylyqty jetkizý. Jan-uıasynan aıyrylǵan zarly
ananyń beınesin ashý. Osynyń bárin rejısserymyz talap etip jatqandaı, emoııany
asyra qoldanbaı, qarapaıym túrde kórermenge jetkize bilýimiz kerek. Bizdiń bir
sózimiz shynaıy estilmese, ol kisi daıyndyqty bólip tastap, qaıtadan basynan
bastatqyza beredi. Qıyn. Degenmen, barymyzdy salyp jatyrmyz. Daıyndyq ótken
saıyn, alǵashqy kúnnen áldeqaıda nátıje jaqsarǵany baıqalady. Al endi, baǵasyn
beretin kórermenniń ózi. Sol úshin, kelińizder, kórińizder deımiz.
Olaı bolsa, sizderge sáttilik tileımiz!
