San ǵasyrdan súrleý salyp, adam balasymen birge jasasyp, janynyń rýhanı azyǵy bolyp kele jatqan ónerdiń biri – teatr. Adamǵa sana bitip, qııaldaý múmkinshiligine ıe boldy-aý degen zamandardan, óz ómirine kóz jiberip, kókeıindegisin aıtar kórkem óneriniń orny – sahna. Dál osy qudiretti sahna óneriniń erekshe túri, qoǵam men adam ómirindegi orny bólek salasy – qýyrshaq teatry.
Jańashyldyqqa jany qumar sahnanyń bul salasy, jalpy teatr ónerine júkteler qoǵamdyq salmaqty teń turǵyda kóterip kele jatqandyqtan, qýyrshaq teatrynyń qoǵamdaǵy mańyzynyń zor ekendigi áldeqashan dáleldengen. Respýblıkamyzdaǵy eń iri óner ujymdarynyń biri bolyp sanalatyn Almaty qalasynyń Memlekettik qýyrshaq teatrynyń búginde 83 jyldyq tarıhy bar. Óner oshaǵy álemdik shyǵarmalardy ana tilimizde sahnalaýymen qatar, talantty artıster men qýyrshaq sheberleriniń, rejısserlerdiń, sýretshilerdiń birneshe tolqynyn tárbıelep shyǵardy. Seksen úsh jyldyq shyǵarmashylyq ómirdiń shyǵarmashylyq joly árqıly bolǵanymen, qoǵamdyq mańyzy óte zor boldy.
Alǵashynda balalar tárbıeleý úshin ashylǵan bul ujym, úlken shyǵarmashylyq izdenister men kóptegen jańashyl qoıylymdardy sahnaǵa shyǵarýdyń nátıjesinde, balalar teatry degen sheńberden shyǵyp, qazaq sahna keńistiginde ózindik ornyn qalyptastyrdy.
Búgingi tańda talaı respýblıkalyq, halyqaralyq festıvalderdi baǵyndyryp júrgen óner ujymy «Rýhanı jańǵyrý» baǵdarlamasy aıasynda gastroldik saparlardy da jıi uıymtastyryp, ózge qalalardyń óner súıer jandaryna qyzyqty ári qyzǵylyqty qoıylymdardy tartý etýdi dástúrge aınaldyrǵan. Osy maqsatta a.j. 23-24 maýsym kúnderi arý qala Almatynyń Astana qalasyndaǵy mádenı kúnderi aıasynda Memlekettik qýyrshaq teatry kezekti gastroldik saparyn uıymdastyryp, elordalyqtar men qala qonaqtarynyń nazaryna teatr repertýaryndaǵy úzdik qoıylymdar jol tartady.
Negizgi baǵdarlama boıynsha óner ujymy 23, 24 maýsym kúnderi saǵat 10:00-de Q.Qýanyshbaev atyndaǵy Memlekettik akademııalyq qazaq mýzykalyq-drama teatrynyń sahnasynda kishkentaı búldirshinder nazaryna ásem saz ben áýezdi ánge quralǵan «Arystannyń úreıin qalaı emdeımiz?» (avt. M.Dıacheva, rej. K.Andreeva), al eresekterge saǵat 14:00, 15:00-de Etnoaýyl ulttyq-mádenı kesheniniń sahnasynda poezııanyń shyńyna jetken M.Maqataev jyrlary arqyly teatr artısteri qýyrshaqtarmen birge ómirdi súıýdiń ǵajaıyp úlgisin kórsetetin «Men dep oıla...» (rej. M.Táýekelova) qoıylymyn usynady.
Sondaı-aq, 23 maýsym kúni saǵat 19:00-de Q.Qýanyshbaev atyndaǵy Memlekettik akademııalyq qazaq mýzykalyq-drama teatrynyń sahnasynda zańǵar jazýshy Sh.Aıtmatovtyń «Qus joly» povesiniń jelisimen sahnalanyp, qatparly paraqtardan kıeli sahnaǵa qýyrshaqtar beınesinde jol tartqan «Ana – Jer ana» (avt. Sh.Aıtmatov, rej. D.Jumabaeva) tragedııasy, 24 maýsym kúni saǵat 19:00-de qanshama ǵasyr aǵyny ótse de, ómirdiń kiltin ustap, qundylyǵyn joǵaltpaǵan búgingi tańdaǵy ana men bala baılanysyn sýretteıtin «Ana júregi» (avt. E.Ionov, rej. A.Zaıev) qoıylymy kórermen nazaryna usynylmaq.
Arý Astana –Táýelsizdiktiń sımvoly, Eýrazııa jaýhary. Memlekettik qýyrshaq teatrynyń ujymy elordany mereıli 20 jyldyq mereıtoıymen quttyqtaı otyryp, qala turǵyndary men qonaqtaryn tańǵajaıyp qýyrshaqtardyń ónerinen rýhanı lázzat alyp, jan saraılaryna qýanysh syılaýǵa shaqyrady.
Gúlim KÓPBAIQYZY,
«Ákimshilik-aqparat» bóliminiń jetekshisi
