Q.Qýanyshbaev atyndaǵy Memlekettik akademııalyq qazaq mýzykalyq drama teatry 31 mamyr kúni, saǵat 19.00 «Beıbitshilik jáne Kelisim saraıynda» «Qyzyl oramaldy shynarym» atty lırıkalyq dramasynyń tusaýkeserin ótkizedi.
Qoıylym rejısseri – Qazaqstannyń Halyq artısi Talǵat Temenov.
Qoıýshy sýretshisi – Rahat Saparalıeva.
Sýretker jazýshy, qarymdy qalamger Sh.Aıtmatovtyń mahabbat taqyrybynda qalam terbegen «Armanym, Áselim» povesi negizinde Qazaqstannyń Halyq artısi, rejısser Talǵat Temenov «Qyzyl oramaldy shynarym» lırıkalyq dramasyn usynady.
Spektakldiń basty keıipkerleri – Ilııas pen Ásel taǵdyrdyń jazýymen kezdesken edi. Oıda-joqta kezdesýden bastalǵan tanystyq úlken mahabbatqa ulasady. Ekeýiniń kirshiksiz taza, adal mahabbattaryna kedergi bolǵan ne jaǵdaı? Uzatylyp bara jatqan jerinen týǵan týystaryn tastap, súıgenimen kete barǵan Áseldiń ómiri qalaı boldy? Bir-aq ret jiberilgen aǵattyq Ilııastyń otbasynan aıyrylýyna ákep soǵady. Aqyr sońynda naǵyz sulý, pák jandy Áselmen birge qalatyn kim, osy bir shyrǵalań dúnıede qaısysy jeńiske jetedi? Qoıylymda sezim men namys synǵa túsip, «bastaryna beıýaq baqytsyzdyq ornaǵan» jandardyń ómiri baıandalady.
Súıispenshilik, adaldyq, syılastyq, dostyq, kóre almaýshylyq, jaýapkershilik, qamqorlyq syndy taqyryptar qozǵalatyn lırıkalyq dramada názik sezim, ishki muń jatyr. Spektakl ómirdegi umytylmas, júrektiń túkpirinde tereń saqtalǵan qımas mahabbatty áspetteıdi.
