Press-konferenııaǵa teatr dırektory, Qazaqstannyń eńbek sińirgen qaıratkeri Erlan Bilál, teatrdyń kórkemdik jetekshisi, Qazaqstannyń Eńbek Eri, KSRO halyq artısi Asanáli Áshimov, teatr dırektorynyń keńesshisi Esmuhan Obaev, Qazaqstannyń halyq artısi, Memlekettik syılyqtyń laýreaty Sábıt Orazbaev, teatrdyń «Ádebıet bóliminiń» meńgerýshisi, Halyqaralyq «Alash» syılyǵynyń laýreaty Álııa Bópejanova jáne «Mýzeı» bóliminiń jetekshisi Nargız Tamabekqyzy qatysty. Jıynnyń moderatory teatrdyń «Baspasóz qyzmeti» bóliminiń jetekshisi, Halyqaralyq «Alash» ádebı syılyǵynyń laýreaty Baqyt Bedelhan boldy.
Kórmeniń ashylý saltanatynda Áýezov teatrynyń kórkemdik jetekshisi, Qazaqstannyń Eńbek Eri, KSRO halyq artısi Asanáli Áshimov quttyqtaý lebizin jetkizdi. Ǵ.Músirepov atyndaǵy Qazaq Memlekettik akademııalyq balalar men jasóspirimder teatrynyń dırektory Sábıt Ábdihalyqov, Abaı atyndaǵy Qazaq Memlekettik akademııalyq opera jáne balet teatrynan Qanat Qarajanov ujymdarynyń atynan aq peıil, aqjarma tilekterin jetkizdi.
Quttyqtaý sózderinen soń kórmeniń lentasy qıylyp, Áýezov teatry «Mýzeı» bóliminiń jetekshisi Nargız Tamabekqyzy kórmege qoıylǵan qundy jádigerlermen tanystyrdy.
Almaty qalasyndaǵy 8 teatrdyń qatysýymen tuńǵysh ret uıymdastyrylǵan kórmeniń maqsaty – óskeleń urpaqqa, teatr ónerine qyzyǵatyn izdenýshilerge, jalpy ónersúıgish qaýymǵa qazaq óneriniń qarashańyraǵy, 92 jyldyq tarıhy bar M.Áýezov atyndaǵy Qazaq Memlekettik akademııalyq drama teatrynyń qurylǵan kezeńinen bastap búgingi kúnge deıingi óner shejiresinen syr shertip jáne Almaty qalasynda ornalasqan mádenı ordalardyń
basyn qosý arqyly olardyń tarıhyn bir arnada toǵystyryp, teatr mýzeıiniń tynys-tirshiliginen habar bere otyryp, mol mura, qundy jádigerleri týraly maǵlumat berý.
Kórmege qazaq óneriniń qarashańyraǵy – M.Áýezov atyndaǵy Qazaq Memlekettik akademııalyq drama teatry, Abaı atyndaǵy Qazaq Memlekettik akademııalyq opera jáne balet teatry, Ǵabıt Músirepov atyndaǵy Qazaq Memlekettik akademııalyq balalar men jasóspirimder teatry, Respýblıkalyq nemis drama teatry, Memlekettik Respýblıkalyq koreı mýzykalyq komedııa teatry, N.Sa atyndaǵy Memlekettik orys balalar men jasóspirimder teatry, Q.Qojamıarov atyndaǵy uıǵyr mýzykalyq komedııa teatry jáne M.Iý. Lermontov atyndaǵy Memlekettik akademııalyq orys drama teatrynyń qundy jádigerleri qoıyldy.
8 teatr mýzeıiniń basyn qosyp kórme uıymdastyrýdyń maqsaty – ult rýhanııatynyń tutastyǵyn tý qylyp, elimizdegi barlyq teatrlardyń mýzeıindegi qundylyqtar men jádiger-muralardyń basyn biriktiretin respýblıkalyq deńgeıde kórme uıymdastyrý. Bul qazaq teatr ónerindegi ulttyq qazynamyzdyń qaınar bulaǵy, jańǵan shyraǵy bolmaq.
Kórmeniń saltanatty ashylý rásiminen soń qarashańyraqqa jınalǵan qaýym M.Áýezovtiń «Abaı» tragedııasyn tamashalady. Uly jazýshynyń klassıkalyq shyǵarmasymen jańa maýsymnyń shymyldyǵy túrildi.
Teatr ujymynyń 92-shi maýsymda ótkizetin is-sharalary men mereıtoı keshteri jyldaǵydan kóp bolmaq. Osy maýsymda teatr kórermenderi kórnekti teatr synshysy Áshirbek Syǵaıdyń 70 jyldyǵyn, uly jazýshy Muhtar Áýezovtiń 120 jyldyǵyn, belgili jazýshy-dramatýrg Dýlat Isabekovtiń 75 jas mereıtoıyn jáne t.b. teatr óneri qaıratkerleriniń mereıtoıyn atap ótedi. Jańa maýsymda A.Súleımenovtiń «Adasqaq» shyǵarmasyn Álııa Bópejanovanyń sahnalyq nusqasymen Áýbákir Rahımov, al jas dramatýrg A.Muratqyzynyń «Bir kúndik ǵumyr» pesasyn Eslám Nurtazın qoımaq.
Áýezov teatry óz sahnasynda esimi belgili qalamgerler men jas býynnyń shyǵarmasyn qatar qoıý arqyly, dástúr sabaqtastyǵyn jalǵastyrýdy kózdeıdi. Osy maqsatty basty nazarda ustaǵan teatr ujymy, jas daryndardyń shyńdalýy úshin, bar múmkindikti jasamaq nıette...
