Almaty qalasynda QR Mádenıet jáne sport mınıstrligi jáne Qazaqstan Respýblıkasynyń Tuńǵysh Prezıdenti – Elbasynyń qory qoldaýymen uıymdastyrylǵan Qazaq derekti kınosy kúnderi sheńberinde “Senim jolynda” atty derekti fılmniń tusaýkeseri ótti. Atalǵan kınotýyndyny Sh.Aımanov atyndaǵy “Qazaqfılm” AQ Qazaqstan Respýblıkasy Mádenıet jáne sport mınıstrliginiń tapsyrysy boıynsha Qazaqstan Respýblıkasy Din isteri jáne Azamattyq qoǵam mınıstrliginiń qoldaýymen túsirdi. Rejısseri - Ásııa Baıǵojına.
Fılmde búgingikúnniń ózekti máseleleriniń biri – din jolyndaǵy adasýshylyq týraly baıandalady. Negizgi epızodta – dúıim eldi dúrliktirgen, birneshe adamdardyń ómirin qıyp, 40-qa jýyq jergilikti turǵyndardy jaralaǵan qandy oqıǵa – 2016 jyly maýsymnyń 5-de bolǵan Aqtóbedegi terakt. Bul fılm muraǵat materıaldaryna, lańkesterdiń shabýylynan aman qalǵan jandardyń, dástúrli emes ıslam aǵymyn ustaýshylardyń jaqyndarynyń estelikterine negizdelgen.
- Islam dinine qatysty kóteriletin barlyq máseleler meni qashan da qyzyqtyrady. Maǵan osy fılmdi túsirýge usynys jasaǵanda, taqyryptyń kúrdeliligine qaramastan birden kelisimimdi berdim. Osy fılmdi jasaýda bedeldi dintanýshy Asqar Sabdın úlken kómek kórsetti. Sondaı-aq, asa túsinýshilikpen qarap, tótenshe jaǵadaıda jumys jasaǵandary úshin fılmniń túsirý tobyna alǵysymdy bildiremin, – dedi fılmniń rejısseri Ásııa Baıǵojına.
Aıta ketsek, derekti fılm tórt bólimnen quralǵan. Ár bólim keıipkerlerdiń esimderimen atalady, olar: Jazıra – bes balasymen jáne kúıeýimen birge Sırııaǵa ketken; Janserik – Aqtóbedegi túrmede terakt úshin jazasyn ótip jatyr; Dıana – 16 jastaǵy kolledj stýdenti, Túrkııaǵa baryp, keıin Sırııaǵa ótip ketken; Marat – Shymkent qalasynyń 45 jasar turǵyny, orys pániniń muǵalimi, áıelin, alty balasyn alyp Sırııaǵa ketken...
Jastarymyz nege din jolynda adasýda? Bul jolǵa olardy ne ıtermeleıdi? Jastardyń dinı saýattylyǵy qandaı, dástúrli dinge bet burý amaldary bar ma? Fılmde osy jaıynda belgili teologtar jáne din qyzmetkerler, saıasatkerler men tarıhshylar, memlekettik organ qyzmetkerleri jáne qoǵamdyq uıymdardyń belsendileri óz oılarymen bólisedi. Fılmniń túsirý jumystary Almaty, Aqtóbe, Ońtústik Qazaqstan jáne Atyraý oblystarynda, Ýfa jáne Máskeý qalalarynda júrgizildi.
Rejısseri: Ásııa Baıǵojına
Senarıı avtorlary: Ásııa Baıǵojına, Mereke Qasen
Operatorlar: Renat Qosaı, Nursát Ákimhan
Keńesshi: Asqar Sabdın
Dybys rejısseri: Beıbit Isametov
Beıneınjener: Nıkolaı Ponomarev
Kompıýterlik grafıka: Andreı Kısılev
Ákimshi: Lıýbov Radıonova
Dırektory: Nurgúl Nurjigitova
Rejısser týraly:
Ásııa Baıǵojına – kınodramatýrg, kınorejısser, Qazaqstan kınematografıster odaǵynyń múshesi. 1987 jyly KSRO Memlekettik kıno janyndaǵy senarıster men rejısserler daıyndaıtyn joǵary kýrsyn bitirgen. Sh.Aımanov atyndaǵy “Qazaqfılm” kınostýdııasynda redaktor, keıin derekti fılmder birlestiginiń bas redaktory bolyp jumys istedi. 1990-1996 jyldar aralyǵynda “Parallel” táýelsiz stýdııasynyń kórkemdik jetekshisi boldy. 1991 jyly Ásııa Baıǵojına óziniń alǵashqy rejısserlik jumysy – 1986 jylǵy Jeltoqsan oqıǵasyna arnalǵan “Jarııalanbaǵan sherýdiń hronıkasy” atty derekti fılmi jaryq kóredi. Bul týyndy Qazaqstan Respýblıkasy Jastar jáne jýrnalıster odaqatrynyń arnaıy júldesimen marapattalady.
Fılmografııasy:
Derekti fılmder:
- “Jarııalanbaǵan sherýdiń hronıkasy”, Qazaqfılm, 1991 (N.Chankovamen birlese túsirgen);
- “Qyzyl ımperııa”, 1991, “Granıt” Bı-Bı-Sı” stýdııasy (derekti serıal);
- “Dinmuhamed Qonaev – ómir joly”, 1995, Qazaqfılm;
- “Jaryqqa qumar”, 1998, (G.Aldongarovamen birlesip túsirgen, QR Prezıdenti TRK);
- “Baqyt formýlasy”, 2007, “M`art”;
- “Elim-aı. Repatrıanttar hronıkasy”, 2007, Qazaqfılm;
- “Ýálıbaıdy eske alý”, 2008.
Derekti fılmderdiń senarıı avtory:
- “Sý – ómir nári”, 1986, Qazaqfılm;
- “Aýyldyń kórinisteri”, 1988, Qazaqfılm;
- “Qoryq”, 1989, Qazaqfılm;
- “Shpıon”, 1989, Qazaqfılm jáne basqalary.
Derekkóz: www.kazakhfilmstudios.kz
