Almatyda Qazaq derekti kınosy kúnderi ótip jatyr

Almaty qalasynda derekti kıno aptalyǵy óz bastaýyn aldy
Almatyda Qazaq derekti kınosy kúnderi ótip jatyr

Búgin Almatyda «Rýhanı jańǵyrý» baǵdarlamasy aıasynda QR Mádenıet jáne sport mınıstrligi jáne Qazaqstan Respýblıkasynyń Tuńǵysh Prezıdenti – Elbasynyń qory qoldaýymen Qazaq derekti kınosy kúnderi ashyldy.

Elimizdiń belgili rejısserleri men shyǵarmashylyq ýnıversıtetterdiń stýdentteri qatysqan Qazaq derekti kınosy kúnderiniń ashylýy saltanatynda, «Qazaqfılm» kınostýdııasynyń «Derekti kıno jáne kınoshejire» shyǵarmashylyq birlestiginiń jetekshisi Áset Ernazarov jaqynda ǵana Ekaterınbýrg qalasynda ótken  HHVIII «Reseı» derekti kıno festıvalinde qazylar alqasynyń arnaıy «Ómirdi súıetin keıipkerdiń obrazyn kórsete alǵany úshin» atty júldesin «13 shaqyrym» fılminiń rejısseri Vladımır Tıýlkınge tabystady.  

Vladımır Tıýlkınge júldesin tabystaý sáti

- Eki aı boıy ár sársenbi kúnderi Qazaqstan Respýblıkasynyń tuńǵysh prezıdenti – Elbasynyń qorynyń kınozalynda elimizdiń derekti kıno metrlary, sonymen qatar jas rejısserler túsirgen derekti kınolar kórsetiledi. Derekti fılmder prokatqa shyqpaıtyndyqtan, zamanaýı Qazaqstannyń ózekti máseleleri jóninde baıandaıtyn otandyq dokýmentalısterdiń sońǵy eki jylda túsirgen jumystaryn kórip, tanysýǵa biregeı múmindik týyp otyr, - dedi Áset Ernazarov.

Qazaq derekti kınosy kúnderiniń ashylýynda Sh.Aımanov atyndaǵy «Qazaqfılm» kınostýdııasy jaryqqa shyǵarǵan «Óıtkeni jaqsy kóremin», «Tústerdiń úılesimdiligi» jáne «Naırı» atty jas rejısserlerdiń jumystary kórsetildi.

Sonymen qatar, mádenı is-shara barysynda «Qazaqfılm» kınostýdııasy shaǵarǵan basqa da derekti fılmder kórsetiledi, olar: «Kazahskıı renessans. Jumat Shanın» (rejısseri A.Kamenskıı), «Qazaq bıi» (rejısserleri Ǵ.Nasyrov, A.Sadyqova), «Senim jolynda» (rejısseri Á.Baıǵojına), «Altyn Emel» (rejısseri O.Belıalov), «13 shaqyrym» (rejısseri V.Tıýlkın), «Jigitter ony Batıa dep ataıdy» (rejısseri A.Ahmetjanova), «Otan neden bastalady» (rejısseri E.Bekturov).  Barlyq fılmderdiń qoıýshy rejısserleri men shyǵarmashylyq toptyń ókilderi óz kartınalaryn kórermenge tanystyratyn bolady.