ҚР Мәдениет және спорт министрлігінің қолдауымен, 2018 жылдың 07/16/23/30 қараша күндері Жамбыл атындағы Қазақ мемлекеттік филармониясында Қазақстан Республикасының мемлекеттік академиялық симфониялық оркестрінің (ҚР МАСО) қатысуымен, көрнекті дирижер, Қазақстанның Халық артисі, мемлекеттік сыйлықтың лауреаты, профессор - Төлепберген Әбдірашевтің 70 жас мерейтойына арналған халықаралық классикалық музыка фестивалі өтеді.
Төлепберген Әбдірашев (1948-2007жж.) – Алматы консерваториясының «Халық аспаптары оркестрінің дирижеры» мамандығын және Мәскеудің Чайковский атындағы консерваториясының «Дирижерлық класын» бітірген. Н.Тілендиев атындағы академиялық фольклорлы-этнографиялық «Отырар сазы» оркестрінің, Қазақ опера және балет театрының, Құрманғазы атындағы Қазақ мемлекеттік академиялық халық аспаптар оркестрінің, 1979-1982 жылдары Қазақстанның мемлекеттік академиялық симфониялық оркестрінің көркемдік жетекшісі әрі бас дирижеры болды.
1977 жылы Батыс Берлинде өткен «Герберт фон Караян қоры» халықаралық дирижерлер конкурсында құрмет дипломын алған. Бүкілодақтық «Ленин комсомолы» сыйлығының лауреаты, ҚазақССР «Еңбек сіңірген қайраткері», Қазақстанның Халық артисі, мемлекеттік сыйлықтың иегері, Жаңақорғанның «XX ғасыр адамы» атанған. Ол көптеген талантты жастарды тәрбиелеген. Оқушылары арасында Қ.Ахметов, Ж.Жумабеков, А.Бурибаев, А.Абдинуров, Е.Ахмедьяров, А.Уразгалиев, Е.Нуртазин, К.Омаров сияқты атақты дирижерлар бар. Маэстроның кәсіби шеберлігін әлемнің көптеген елдерінде мойындаған. АҚШ, Англия, Германия, Корея, Түркия және басқа да елдердің симфониялық оркестрлерімен өнер көрсеткен.
Әріптес-досын, ұстаз-тәлімгерін еске алу үшін әлемге әйгілі кәсіби академиялық музыканттар, дарынды тұлғалар келеді деп күтілуде. Қазіргі таңда ҚР МАСО ұжымын басқаратын Төлепберген Әбдірашевтің оқушыларының бірі – Қанат Омаров: «Бұл фестиваль маэстроның шығармашылық және ағартушылық еңбегіне тарту болмақ. Бетховенның, Брамстың, Шопенның, Малердің, Рахманиновтың және Шостаковичтың шығармаларының басын қосатын концерттік бағдарлама ұсынамыз. Көпшіліктің көңілінен шығатынына сенемін.», - деді.
Фестивальға әлемдік деңгейдегі дирижерлар мен орындаушылар қатысады:
- Михаил Юровский – Берлин радиосының симфониялық оркестірінің шақырылған дирижеры. 2003 жылдан бастап австриялық Тонкюнстлер оркестрінің шақырылған бас дирижеры. Ла Скала және Париж операсымен, Гевандхаус оркестрімен, Дрезден мемлекеттік капелласымен бірге қызмет еткен.
- Мурад Аннамамедов – Ярослав академиялық симфониялық оркестрінің көркемдік жетекшісі және бас дирижеры, РКФСР еңбек сіңірген өнер қызметкері, Ресейдің Халық артисі, Л.Собинов, И.Архипова сыйлықтарының лауреаты.
- Михаил Воскресенский – Мәскеу консерваториясының фортепиано кафедрасының меңгерушісі, Мәскеу сыйлығының лауреаты (2011) және Жапония «Күн шығыс» орденінің кавалері.
- Айман Мусахаджаева – Өзбекстанның еңбек сіңірген артисі, Қазақстанның Халық артисі, мемлекеттік сыйлығының лауреаты, Қазақ ұлттық өнер университетінің ректоры.
- Амир Тебенихин – атақты қазақстандық пианист, көптеген халықаралық конкурсының лауреаты. Қазақстанның еңбек сіңірген қайраткері. 2011 жылы Германияның «Deutscher Pianistenpreis» конкурсында үздік пианист болып танылған.
- Қанат Омаров – Құрманғазы атындағы Қазақ ұлттық консерваторияның түлегі. Құрманғазы атындағы ҚҰК симфониялық оркестрінің дирижеры болған. ҚР Мемлекеттік симфониялық оркестрімен, Тынық мұхиты музыкалық фестивалінде Цюрих камералық оркестрімен жұмыс жасаған. 2015 жылдан бастап ҚР МАСО бас дирижеры.
Спикерлер:
- Жамбыл атындағы Қазақ мемлекеттік филармониясының директоры, ҚР еңбек сіңірген қайраткері - Дәлел Зейнешұлы Уәшев
2. ҚР МАСО бас дирижеры - Қанат Омаров
3. ҚР еңбек сіңірген қайраткері, мемлекеттік үрмелі аспаптар оркестрінің бас дирижеры,Маэстроның шәкірті - Қанат Ахметов
4. Құрманғазы атындағы ҚҰК проректоры, ҚР мәдениет қайраткері, Маэстроның ұлы - Бақтияр Төлепберген
