Qundy óner qýyrshaq teatry kórermenderimen qaıta qaýyshpaq!

Ǵajaıyptar men ertegiler álemi tapqyr da utymdy sheshimderge qurylǵan, jan saraıy tek jaqsylyq pen meıirimdilikke toly keıipkerlerimen erekshelenip, aıaýshylyq pen baýyrmaldyqqa úndeıtin áıgili «Qyzyl telpek» (rej.:S.Maqulbekov) ertegisimen esigin qaıta ashýdy josparlaýda. Osy oraıda, qaýipti indettiń saldaryna baılanysty, teatr kórermenderin «ASHYQ» mobıldi qosymshasy arqyly densaýlyq statýstaryna sáıkes kirgizetindigin eske salamyz.
Qundy óner qýyrshaq teatry kórermenderimen qaıta qaýyshpaq!

Buǵan deıin teatr ujymy qýyrshaq álemine ǵana emes, kórermenderge, sonymen qatar, teatr qyzmetkerleri úshin de qolaıly, ózindik dara  jumys baǵytyn qalyptastyryp, áleýmettik jelilerdiń múmkindikterin keńinen paıdalaný arqyly kórermendermen tyǵyz qarym- qatynasta bolyp, mańyzdy da paıdaly jobalar usynyp, osy baǵytta qyzmetkerlerdiń de ýaqytyn tıimdi paıdalaný maqsatynda úı jaǵdaıynda jumys jasaýdyń artyqshylyqtaryn kópshilikke keńinen usynyp, óz deńgeıinde dáriptegen bolatyn. Jańa jobalardy talǵammen tańdap, oqıǵa jelisimen eliktiretin úzdik týyndylarmen búldirshinderdiń ishki sezimine áser etý arqyly jan dúnıesine qozǵaý salyp, izgi minez  qalyptastyrýǵa baǵyttalǵan aqparattyq-

tanymdyq «Ertegiler aptalyǵy», «Qupııaǵa toly qýyrshaqtar álemi», «Úıren de jıren, balaqaı!», «Balalarǵa bazarlyq» syndy aıdarlardy, eresekterge arnalǵan «Asyl qazyna aıasynda», «Óleń, men seni súıip ótem» jobalaryn úzdiksiz usyný arqyly kórermen suranysyn qanaǵattandyrýǵa barynsha atsalysty.

Qazirgi tańda teatr ujymy jas jetkinshekterdiń rýhy taza, sanasy bıik, bilimdi de bilikti tulǵa bolyp damýyna, qundy óner qýyrshaq teatrynyń mańyzyn uǵyndyrýǵa, sahna óneriniń syryn tanytyp, teatr qyzmeti men shyǵarmashylyǵyna nazar aýdartýǵa, aınalasyn qurmetteýge baǵyttalǵan jańa jobalar men rýhanı-adamgershilik qundylyqtar men ulttyq rýhty qalyptastyrýǵa baǵyttalǵan qoıylymdardy sahnalaýǵa daıyndyq ústinde.

Baldyrǵandarymyzdyń baldaı kúlkileri men tańdaı qaǵar tańdanystaryn týǵyzatyn qarapaıym qýyrshaq arqyly ǵana búkil bir sheksiz álemdi jasap shyǵaryp, jan saraıyńa sáýle sebetin qasıetti orda – Almaty memlekettik qýyrshaq teatry kórermenderimen árkez birge!

Teatrda júzdeseıik!