2016 jyldyń qarasha aıynda rejısser Sábıt Qurmanbekovtyń «Oralman» tolyqmetrajdy kórkem fılminiń BAQ-na arnalǵan jabyq kórsetilimi ótip, shyǵarmashylyq top týyndynyń premerasy 2017 jylǵa josparlanyp otyr dep habarlaǵan bolatyn.
QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen týyndynyń senarııin rejısserdiń qatysýymen, «Meniń atym Qojadaǵy» Qojanyń beınesimen halyqqa tanys akter, kınodramatýrg Nurlan Sanjar jazǵan.
Fılm HH ǵasyrdyń 30-jyldary Aýǵanstanǵa qonys aýdarýǵa májbúr bolǵan qazaq otbasy týraly. Bas keıipker Bazarbaı qarttyń sol jaqta bir qyz, bir uly dúnıege keledi. Balalary eseıip, otbasyn qurady. Keıinnen týǵan jerdiń topyraǵyn ańsap, súıeginiń ata-jurtta kómilgenin qalaǵan qart Qazaqstanǵa oralyp, kóz jumady. Uly Saparqul ákesin aqtyq saparǵa jalǵyz ózi shyǵaryp salady...
Aýǵanstanda jáne Almaty oblysynda túsirilim jumystary ótken fılm, Irannyń Tegeran qalasynda aǵymdaǵy jyldyń 21-28-sáýir aralyǵynda uıymdastyrylǵan 35-Halyqaralyq Fadjr kınofestıvalinde «Shyǵys panoramasy» baǵdarlamasy boıynsha «Azııanyń úzdik fılmi» ataldy. Sondaı-aq, «Ekspo -2017» Halyqaralyq mamandandyrylǵan kórme aıasynda 22-28 shilde aralyǵynda Elordada ótken «Eýrazııa-2017» festıvaline qatysyp, «Bas júldeni» (Gran-Prı) jeńip aldy.
Osy syndy júldelerdi ıelengen kınokartına 5-11 qyrkúıek aralyǵynda Tatarstannyń Qazan qalasynda ótken XIII Halyqaralyq musylman kınosy festıvaline qatysty. Bul óner dodasy 2005 jyldan beri Tatarstanda ótkizilip kele jatqan Reseıdiń iri kınofestıvalderiniń biri bolyp tabylady. On jyldan astam ýaqyt aralyǵynda uıymdastyrylyp júrgen baıqaýǵa otandyq kınokartınanyń qatysýy biz úshin mártebe bolsa, dramadaǵy beınesi úshin akter Dýlyǵa Aqmoldanyń «Úzdik er adam roli» júldesin jeńip alýy, qazaq kıno ónerine qosylǵan olja dep túsingenimiz abzal.
Esim Segizbaev, Dýlyǵa Aqmolda, Shynar Asqarova, Baıan Qajynábıeva, Erjan Túsipov qatarly belgili akterler túsken kınotýyndy 15 qyrkúıekten bastap elimizdiń barlyq kınoteatrlarynan kórermen nazaryna usynylady.
