Búgingi tańda qýyrshaq teatry búkil dúnıe júzinde bar. San ǵasyrdan beri adam balasymen birge jasasyp ta kele jatyr. Qaı ultta bolmasyn qýyrshaq elementteri baǵzy zamannan oryn alǵan. Tek tili, janry, formasy jaǵynan ǵana mazmuny ushtas, áreketi bólek. Biraq kez-kelgen búldirshinniń tilin taba biletin qýyrshaqtar sonaý dala teatrynan qalyptasyp búgingi kishkentaı kórermenderdiń kóz qýanyshyna aınalǵaly da bir ǵasyr. Qýyrshaq dese – oıyn uǵymy birden sanamyzdy jaýlap alatyny haq. Biraq sol oıyndy san qubylyspen balalar sanasyna sińirý árıne avtormen, akterdiń sheberliginde. Sol sheberlik arqyly qýyrshaq teatry aýdıtorııasynan Siz halyq ertegilerimen qosa, batyrlar jyryn, ańyz-áfsanalardy, dramalyq shyǵarmalardy tanymal ánshilerdiń, ózin qýyrshaq sahnasynda balalarmen qaýyshyp jatqanyn kóresiz. Teatr – rýhanı meıirimge, yntymaqtastyqqa, dostyqqa, balanyń rýhanı ósýine, qııalynyń erkin jetilýine birden-bir sebepshi ekeniniń de kýási bolasyz.

Almaty Memlekettik qýyrshaq teatry úshin 82-maýsym erekshe shyǵarmashylyq jyl boldy. Teatr repertýaryna balalar ertegisinen basqa da janrlar qosyldy. Sonymen qosa teatr kórermender úshin bes kún boıy spektaklder kórsetýdi alǵa qoıdy. Iakı kórermenderi kóbeıdi. Almaty qalasyndaǵy jalǵyz qýyrshaq teatry bolǵandyqtan bıyl maýsym esigin jappaı jazǵy jemalysqa shyqqan búldirshinlerge qýanysh syılady. Buryn spektaklder tek 11.00-de jáne 12.30-da ǵana kórsetilse, bul joly keshki 18.00-de de kórsetiletin boldy. Buryn teatr 12 jasqa deıingi kórermenderdi qamtyǵan bolsa endi on ekiden joǵary jastaǵy kórermenderdi de qýyrshaq teatryna baýlydy. Ol eresekterge arnalǵan ertegi qoıylymdar edi. Iá, jylda bilim ordasynan rejısserler bilim alyp jatqanymen de qýyrshaq teatrynyń spektaklderin sahnalaıtyn rejısser joqtyń qasy. Sondyqtan da qýyrshaq teatrynyń artısteri ózderin rejısserlik tarapynan da synap kórý maqsatynda spektaklderdi ózderi qoıdy. Ol rejısserdyń joqtyǵynan emes, osy teatrda kóp jyldardan beri óziniń sheberligin shyńdap, qýyrshaqtyń qyr-syryn meńgerip tájirıbe jınaqtaǵandyqtan árıne. Mádenıet qaıratkeri Taýekelova Maral M.Maqataevtyń «Men dep oıla» poetıkalyq qoıylymyn sahnalady. Ǵasyr aqyny Muqaǵalıdy qýyrshaq beınesinde, bala júreginde sóıletti. Aqqýlar poemasynda aqqý-qýyrshaqtar bıi oqıǵany qoıýlandyra tústi, «Qos qarlyǵash» óleńin kóleńkeli teatr arqyly anımaııalyq úlgide sheshti. «Aq shaǵala» aktrısa G.Ónimbaıdyń oryndaýynda shaǵala-qýyrshaqtyń toptyq bıimen úılesim taýyp kórermenderdi baýrap aldy. Aqynnyń óleńine jazylǵan ánder oryndalyp «Muzarttyń» parodııalyq qýyrshaqtary jasalynyp teatr artısteri A.Jaqypbaev, Sh.Qulnazarov, B.Kaıýovtar qýyrshaqty naq tulǵadan aınytpaı qozǵaltyp, júrgizip, bir demmen topty alyp shyqty. Árıne munyń barlyǵynyń artynda sıqyrly qara kabınettegi akterlerdiń sahnadaǵy júrek kózi, sezim tynysy, sheksiz sheberlik jumystary tur. Qoıylym barysynda «Fan klýb» jumys jasady, stýdentter Muqaǵalı jyrlaryn oqyp saıysqa tústi, teatr artısteri mádenıet qaıratkeri K.Ilıasovamen, Qazaqstannyń eńbek sińirgen artısi S.Abýevalar qazylyq jasap arnaıy syılyqtarmen marapattady. Al akter A.Jaqypbaev «Shyǵys ertegisin», M.Kamalov ǵashyqtar kúnine arnap «Mahabbat gúli solmaıdy» qoıylymyn sahnalady. Akter Sh.Qulnazarov pen aktrısa A.Baıyrbekova qoıylymda qos ǵashyqtyń sezimin bımen úılestirip mekteptegi balalyq sezimdi baıandy mahabbatqa ulastyrdy. Artıst B.Qaıýov 1 maýsym balalar kúnine arnap ertegi keıipkerleriniń qatysýymenen «Baqyt qusy» atty konerttik shoý baǵdarlamalyq qoıylymdy daıyndady. Teatr foesinde ertegi keıipkerlermen oıyn-saýyq qurǵan balalar teatr sahnasynda Baqyt qusynyń qııal-ǵajaıyp oqıǵasymen úndesti. Sondaı-aq «Shıpajaı» balalardy emdeý ortalyǵy jáne qalalyq múmkindigi shekteýli balalar úıiniń kishkentaı kórermenderine teatr qaıyrymdylyq spektaklder kórsetip qýantyp keledi.

Sáýir aıynda jas rejısser Rústem Janyamanov Qazaqstannyń eńbek sińirgen qaıratkeri, rejısser Jaqyp Omarovtyń «Qulynshaq pen Bóltirik» qııal ǵajaıyp ertegisin qýyrshaq teatrynyń sahnasynda, qýyrshaq janrynda birinshi ret sahnalandy. Sondaı-aq rejısser R.Janyamanovtyń da qýyrshaq teatryndaǵy tyrnaqaldy týyndysy edi. Qoıylymnyń sahnadaǵy barlyq áreketi tek qana qýyrshaqtarmen ǵana emes, sahna sýretshisi S.Karpeldiń sheberliginen týyndaǵan medııadekoraııalar kishkentaı kórermenderdi beı-jaı qaldyrmady. Sahnalyq júıesin jasaǵan T.Atymtaeva dúnıege jańa kelgen qulynshaq pen bóltiriktiń dostyǵy arqyly balalardy jaqsylyq pen jamandyqtyń ara jigin ajyratýǵa, dostyqta shekara bolmaıtynyn dáriptedi. Fılosofııalyq turǵydan sheshilgen Ana dalanyń qushaǵynyń keńdigine, meıirimge toly ystyq yqylasyna kórermenderde ılandy. Eki toptyń arasyndaǵy ejelden kele jatqan taıtalasqa qaramastan eki bas keıipker dostyǵyn úzbedi. Qýyrshaq qulynshaq-A.Saqtaǵanova, qýyrshaq-bóltirik-T.Tleýlıeva qýyrshaqtarmen birge oınaqtap, birge qýanyp, birge dostyqty jeńdi. Qasqyrlardyń qatygezdigi men jylqylardaǵy tektilik búgingi adamdar arasyndaǵy qarym-qatynastyq jaǵdaılardy kórsete bilgendeı. Qoıylym qııal-ǵajaıyp bolǵanymende mýzykamen árlegen A.Joldashanda qasqyrlar tobyrynyń baqtalastyq, taqtalastyq sahnalaryn zamanaýı sheteldik áýendermen ásirelep, oqıǵaǵa ózgeshe saryn berip otyrdy. Teatr horeografy G.Dáýletqulovanyń da eńbegi erekshe baǵalandy. Eki toptyń tabıǵı minezine ulasatyn bılermen sahnany birtutastyqqa jeteledi. Kókjal –B.Momynjanov qoıylym boıy bórilikke tán tektilikti joǵaltpaı kópshilik sahnadaǵy Arlan-Sh.Qulnazarov, Aqazý-U.Momynjanova, Qarajal-A.Taýekelov, Kókbóri-G.Beısembaeva taǵy basqa bóriler tobyn ıirip otyrdy. Qaı topty alsańyzda aty ańyzǵa aınalǵan keıipkerler osy qoıylymda tolyǵymen kezdesedi. Bozaıǵyr –B.Kaıýovta jylqyǵa tán qasıetti óz úıirindegi Qaraqasqa qulynshaqtan bastap Mańmańger-Q.Ótebaı, Qulager-A.Jaqypbaev, Aqbaqaı-Á.Balbaev, Ana bıe-M.Taýekelova, Bozbıe-S.Japıshevalardyń oınaýynda Ana dalanyń(A.Baıyrbekova) ystyq qushaǵynda, tabıǵat tósinde emin-erkin kósilýlerin qadaǵalaıdy. Qoıylymnan alǵan áserlerin jasyra almaǵan búldirshinder qulynshaqpen bóltirikke janashyrlyq tanytyp solarmen birge ómir súrdi.

Qýyrshaq teatry bıyl birden tórt memleketke festıvalge joldama alyp baqtaryn synady. Festıvaldiń ár qashanda tájirıbe almasýǵa, búgingi kúnde balalar taqyrybynda jazylǵan pesalardy talqylap, jańakózqarastyń týyndaýyna jol ashatyny belgili. Bul sol múmkindikterdiń biri edi. 25-29 mamyr aralyǵynda Bishkek qalasynda dramatýrg, rejısser qýyrshaq teatrlarynyń negizin salýshy Vıktor Aleksandrovıch Shvembergerdiń 125-jyldyǵyna oraı II Halyqaralyq «Tak-teke» qýyrshaq teatry festıvaline bardy. Festıvalge ár elden qýyrshaq teatrlary qatysty. Moskva oblystyq memlekettik qýyrshaq teatry V.Shvembergerdiń «Mashenka ı Medved», ózbek Memlekettik qýyrshaq teatry M.Igamnazarovtyń «Bahoroı men Naýrýz», N.Janǵazıev atyndaǵy memlekettik qýyrshaq teatry japon ertegisi D. Kınosıtonyń «Blagodarnyı jýravl», N.Shamýrzaev atyndaǵy Osh oblystyq qýyrshaq teatry B.Asakeevtiń «Prıklıýchenııa Tıgrenka», Qyrǵyz «Rabaıat» qýyrshaq teatry L.Spachılla «Kútpegen qonaq», Mańǵystaý oblystyq qýyrshaq teatry N.Nasyrovanyń «Aıjan ájeıdiń ertegisimen», sondaı-aq Almaty Memlekettik qýyrshaq teatry rejısser Qýbanychbek Adılov sahnalaǵan A.P.Chehovtyń «Kashtanka» qoıylymymen qatysty. «Kashtanka» qoıylymy jeńil ári tereń fılosofııalyq pálsapaǵa qurylǵan. Beıtanys jandardyń úıine kelgen kishkentaı sary ıttiń tarıhy eresekterdi de, kishkene kórermenderdi de beı-jaı qaldyrmaıdy. Kishkentaı ǵana ıttiń ómir jolynyń taıtalasyna túsýi, erkindikte júrse de erkindikti sezine almaı jaısyzdyqty bastan keshedi. Bir saryndy, ish pystyrarlyq ómir ıttiń taǵdyryn tarazyǵa salady da ıttiń de adamı sezimin bıik qoıady. Qyrǵyz kórermenderimenen kelgen qonaqtardyń yqylasyna bólengen qoıylym «Klassıkalyq shyǵarmany qýyrshaq janrynda kórsetkeni úshin» nomınaııasyn teatr ıelense, «Eń úzdik rejıssýra» nomınaııasyn rejısser Qýbanychbek Adylov ıelendi. Sondaı-aq Qyrǵyz teatr qaıratkerleri odaǵy rejısser Q.Adylovty arnaıy dıplommen marapattady. Bir qyzyǵy osy sátte 28 mamyr kúni qýyrshaq teatrynyń ekinshi quramy Moldavııa eli, Kıshınev qalasynda ótip jatqan «Pod shapkoı Gýgýe» atty halyqaralyq qýyrshaq teatrlary festıvaline rejısser, Qazaqstannyń eńbek sińirgen artısi Q.Eshmuratova sahnalaǵan halyq ertegisi «Qańbaq shal» qoıylymyn jıyrma bes memleketten kelgen óner ókilderine kórsetip, «Ulttyq dástúrdi nasıhattaǵany úshin» jáne teatr dırektory, mádenıet qaıratkeri Esenalıev Talǵat Qamqabaıuly «Úzdik menedjer» dıplomymen marapattaldy. «Qańbaq shal» - qazaq halqynyń turmys-salt ertegileriniń biri. Jas urpaqty qarapaıymdylyqqa, aqyl men adal eńbek etýge tárbıeleıtin, halyktyq máni zor shyǵarma. Qara kúshine sengen eki dáýdi de qur keýdeler retinde mysqyldaıdy. Bulardyń bárinen de qarapaıym Qańbaq shaldyń mereıi ústem. Sebebi ol - eshkimge zııan oılamaıtyn, óziniń adal eńbegimen kúneltken eńbek adamy. «Qańbaq shal» - áli kúnge tárbıelik máni bar halyq danalyǵynyń kýási.

Al maýsym aıynda Tatarstan qalasyndaǵy HIII túrki halyqtarynyń «Naýryz» festıvaline dramatýrg Álibek Faızýllaulynyń «Altyn adam» epıkalyq spektaklmen qatysyp arnaıy dıplommen marapattaldy. Qoıýshy rejısseri Reseı federaııasynyń rejıssery Iýrıı Ýtkın. Avtor qazaq halqynyń jeti keremetiniń biri ári biregeıi, 1970 jyldary Jetisý óńirindegi Esik ózeniniń boıyndaǵy arheologııalyq qazba jumystary kezinde tabylyp, búkil álemdi tańǵaldyrǵan Altyn adamdy ertegi-qoıylymǵa arqaý etedi. Týyndy osydan 2500 jyldaı buryn, temir dáýirinde ómir súrgen babalarymyzdyń babalary – saq taıpalarynyń ómir-tirshiligin jas kórermenderdiń kóz aldyna elestetip, azattyq, birlik jolyndaǵy janqııarlyq erlik-shejirelerin pash etedi. Búginde Qazaq Eliniń táýelsizdik sımvolyna aınalyp otyrǵan Qanatty barysqa mingen Altyn adam balalardy jigerlendirip, balalardyń júregine otanshyldyq rýhyn oıatady. Altyn bala –Azat han sonaý bir zamanda Altyn adam kóksegen azattyqqa qol jetkizedi.

Jaqsylyqtyń ústine jaqsylyq qosylyp bıylǵy jyl qýyrshaq teatryna shyǵarmashylyq esigin aıqara ashty. Maýsym aıynda Túrkistan jáne Shymkent qalalarynda Y «Orteke» qýyrshaq teatrlarynyń halyqaralyq festıvali ótti. Al bul festıvalde Túrkııa, Ázirbaıjan, Qyrǵyzstan memleketterinen jáne Aqtóbe, Mańǵystaý, Jezqazǵan, Ońtústik Qazaqstan oblystarynyń qýyrshaq teatrlary óner kórsetti. Festıvalde qýyrshaq teatrynyń anasy atanǵan Qazaqstannyń eńbek sińirgen artısi Q.Eshmuratova qazylar alqasynyń tóraıymy bolsa, teatrymyzdyń aktrısasy, Qazaqstannyń eńbek sińirgen artısi S.Abýeva qazylar alqasynyń múshesi boldy. S. Abýeva sońǵy jyldary kóptegen qýyrshaq festıvalderinde qazylar alqasy. Qostanaı q. «Halyqaralyq qýyrshaq festıvalinde» jáne 2016 j Astana q. Qýyrshaq teatrynyń attestatııadan ótkizý saraptamasynda múshelik jasap óz úlesin qosyp keledi.

Sondaı-aq maýsymnyń 10-17 aralyǵynda Elordamyz Astana qalasynda ótip jatqan «EXPO-2017» halyqaralyq kórmesin ilgeriletý maqsatynda Almaty qalasy mádenıet jáne arhıvter basqarmasynyń qoldaýymen Almaty Memlekettik qýyrshaq teatry maýsym aıynyń 12-16 juldyzy aralyǵynda Q.Qýanyshbaev atyndaǵy akademııalyq qazaq sazdy drama teatrynyń sahnasynda astanalyq kishkentaı kórermenderge teatr repertýaryndaǵy úzdik eki qoıylymdy tartý etti. Qoıylymdar qazaq jáne orys tilinde júrdi. Bes kún boıy drama teatrynyń kórermenderi birden kishkentaı baldyrǵandarǵa aınalyp shyǵa keldi. Kún ótken saıyn qoıylymnyń kórermenderi de kóbeıip zalǵa syımaı jatty. Teatr bul joly avtor M.Polıvanovanyń «Kóńildi qonjyqtar» ertegisin jáne J.Omarovtyń «Qulynshaq pen Bóltirik» qııal ǵajaıyp ertegisin kórsetti. Teatr foesinde, teatr ardagerleri Qazaqstannyń eńbek sińirgen artısi S.Abýeva, Mádenıet qaıratkeri K.Ilıasova, E.Júnisovalar qýyrshaq keıipkerlermen kishkentaı búldirshinderge ertegi qýyrshaq keıipkerlerimen kezdesýlerine múmkindik jasap, olarmen birge ertegi álemine saıahat jasady, teatr qýyrshaǵynyń barlyq qımyl-qozǵalystarymen tanystyrý arqyly bes kún boıy sheberlik sabaqtaryn ótkizip otyrdy. Mádenıet qaıratkeri K.Ilıasovamen mýzykamen kórkemdeýshi A.Joldashan astanalyq Shalqar radıosynda qonaqta bolyp tyńdarmandarmenen qýyrshaq tynysy týraly oılarymen bólisti. Qýyrshaq teatrynyń qoıylymdaryna tek balalar ǵana emes QazKSR Halyq ártisi Qorlan Ihsanqyzy, QR eńbek sińirgen qaıratkeri Túımehan Atymtaeva, Qazaqstannyń halyq artısi G.Áspetova, Qazaqstannyń eńbek sińirgen qaıratkeri N.Jaqypbaev, rejısser Á.Orazbekov, Q.Qasymovtar da qyzyǵýshylyq tanyta otyryp ózderiniń ystyq yqylastaryn aıanyp qalǵan joq.

Al 28-shilde - 7-tamyz aralyǵynda Týrkııa eli, Ankara qalasynda ótetin halyqaralyq festıvalge jolǵa shyqty. Qazaqstan Respýblıkasynyń Túrkııa Respýblıkasyndaǵy elshisiniń Qazaqstanmen Týrkııa arasyndaǵy dıplomatııalyq qarym-qatynastardyń 25 jyldyǵy aıasynda Túrkııa Respýblıkasynda qazaq mádenıeti men ónerin tanytýǵa qosqan úlesi úshin teatr arnaıy alǵys hatpen marapattaldy. Sondaı-aq Túrkııa elinen arnaıy shaqyrý alǵan qýyrshaq teatry qazan aıynyń 20-24 juldyzynda Ankarada ótetin III halyqaralyq qýyrshaq teatrlary festıvaline eki spektaklmen barýǵa daıyndyq jasap jatyr.

2-8 qyrkúıek aralyǵynda Astana qalasynda «EKSPO-2017» Halyqaralyq mamandandyrylǵan kórmesi aıasynda Jas rejısserlerdiń Qaırat Súgirbekov atyndaǵy I Respýblıkalyq forým-festıvalinde drama teatrlardyń aldynda jas rejısser Rústem Janyamanov sahnalaǵan J.Omarovtyń «Qulynshaq pen Bóltirik» ertegisimen qatysyp arnaıy dıplom aldy. Astana qalasyndaǵy sapar gastroldik is-saparǵa ulasyp 1-17 qyrkúıek aralyǵynda kókshe búldirshinderine de qýanysh syılady.

Teatr sondaı-aq, telearnalarmen shyǵarmashylyq birlestikte jumys jasap keledi. Ásirese, Almaty arnasy ishinen «Altyn saqa» baǵdarlamasynan qýyrshaq teatryna arnalǵan «Altyn qaqpa» aıdary ár senbi saıyn efırge shyqty. Efırde kishkentaı búldirshinder qýyrshaq teatryna kelip ertegi qýyrshaqtarmen kezdesip qazaqtyń kóneden kele jatqan dańǵara, ashamaı, ıtaıaq, baıyz, astaý, kúpi, óris syndy sózderdiń astaryn keńinen ashyp túsindirý sabaqtaryn júrgizý arqyly altyn qaqpanyń kórermenderin qyzyqtyra túsetin balalarǵa arnalǵan arnaıy joba boldy. Sondaı-aq «Tań sholpan», «Qaıyrly tań», «Jańa kún», «Kúlip oıan» «Armandar oryndalady», «Aıtýǵa ońaı», «Tarıhqa toly Almaty» baǵdarlamalarynan teatr artısteri jıi kórindi. Ásirese «Shalqar», «Qazaq radıosynan» bala kezimizden qulaǵymyzǵa sińgen keshki ertegi qýyrshaq teatry artısteriniń tizginine berildi. Búgingi tańda stýdııada qazaq ertegilerinen dýblıajdyq jumystar júrgizilýde. Ásirese artısterden erekshe qyry bólek B.Momynjanov kıno men teatrdy, sonymen qatar dýblıaj mamandyǵyn qatar alyp júrgen sheber akter. Búginde telearnalardan kórsetilip júrgen «Qaısar seri Rastı» mýltfılminde Rastı, Aıdahar, patshanyń daýysyn, «Chak balapannyń saıahatynda» atty mýltfılmniń 52 serııasynda Chak balapannan bastap 5 keıipkerdiń daýysyn jasady. Sondaı-aq búginde balalardyń súıip kóretin taǵy bir mýltfılmi «Taıo kishkentaı avtobýstiń» 52 serııasynda da jasyl, qyzyl, traktor, kamaz, samasval t.b. daýysyn jazdy. Ýolta Dısneıdiń mýltfılmderiniń tańdaýyna túsip sonyń ishinde «Aqshaqar jáne jeti ergejeılide» ergejeılilerdiń jáne Ashýlanshaqtyń daýysyna dýblıaj jasap búginde efırden jıi berilip júr. Osy oraıda «Balapan» arnasynyń aqparattyq keńistiginde alatyn orny erekshe baǵalanyp, álemdegi eń úzdik anımaııalyq ónimderdi ana tilimizde sóıletip, saýatty ári sapaly dýblıaj jasaǵany úshin arnaıy alǵys hatymen marapattaldy. Mýzyka bóliminiń meńgerýshisi, ánshi, sazger Arshyn Joldashan AO RTRK Qazaqstan arnasynda júretin «Saz kerýen baǵdarlamasy» boıynsha jeńimpaz atanyp «Seniń ǵashyǵyń» ánimen laýreat atandy. Qazaqstannyń eńbek sińirgen artısi Qarashash Abýeva «Baqsy» -ana, «Aýyl saqshysy» serıalynda Baıbala, «Kelinka Sabına 2» Bas qudaǵı, «Ińkár júrek» Ene, «Anaǵa aparar jol», «Keńesshiler», «Baqsy», «Kináratsyz kúni», «Gorod mechty» fılmderinde de epızodtyq beınelermen kórindi. Akter Taýekelov Altaıda qýyrshaq teatrynyń ómirimen qatar kıno salasynda da «Aıaýly arman», «Ińkár júrek», «Sotqa jetkizbeı» (serıal), «Ár úıdiń syry basqa» fılmderin «Súıe bilseń», «Abzal jan» fılmderine túsip kórermen kózaıymy boldy. Bıylǵy jyldyń kınoteatrlardan júrgen «Naýryz KZ» fılmi qýyrshaq teatry artısteriniń sheberlikterin kórsetti. Teatr artısteri E.Júnisova, B.Kaıýov, rejısser A.Zaıevter basty rolderde oınap joǵary baǵa aldy. Al aktrısa G.Beısembaeva S.J.Asfendııarova atyndaǵy QazUMÝ «Alǵys aıtý» is-sharasynda qazylar alqasynyń múshesi ári «Kýtýno» qýyrshaǵyn bıletip alǵys hatqa ıe bolsa, U.Momynjanova, G.Beısembaeva, M.Kamalov, K.Kýdabaevalar Medeý aýdanynyń ákimi E.Jylqybaevtyń alǵys hatyna, B.Momynjanov mádenıet basqarmasynyń qurmet gramotasymen, E.Haırýshev, M.Taýekelovalar Nur Otan partııasynyń alǵys hatymen, Almaty qalasy maslıhatynyń qurmet gramotasymen T.Tleýlıeva, M,Karıbaeva, O.Abdıbaev, Sh.Qulnazarovtar marapattaldy. Al teatr ujymy qala ákimi B.Baıbektiń alǵys hatynan bastap, «Sábı baqyty» qoǵamdyq qorynyń, «Keńpeıil» múgedekter qoǵamynyń, «Rýhanııat» kásipodaq uıymynyń, Múmkindigi shekteýli balalar úıiniń, Qalalyq balabaqshalardyń, QR Memlekettik ortalyq mýzeıiniń, Almaty qalasy mýzeıler birlestiginiń, «№1 Balalardy týberkýlezge qarsy emdeý shıpajaıy», Medeý aýdandyq Múgedekter Erikti Qoǵamynyń alǵys hattarymen marapattaldy.

Teatr ujymy árqashanda izdenis ústinde ekendigin teatrdyń búgingi tynysynan kóremiz. Sahnalanǵan jańa qoıylymdardy arnaıy teatr synshylarynyń saraptamasynan ótkizýdi de daǵdyǵa aınaldyryp keledi. Sondaı-aq, qoıylymnan tys vokal, hor, bı sabaqtarynan Kórkemdik keńes múshelerine arnaıy synaq tapsyrýda ár akterdiń mindetine aınalǵan. Árıne munyń barlyǵy qýyrshaq teatry artısteriniń barlyq múmkindikterin ashý maqsatynda jasalynǵan teatr basshysy Mádenıet qaıratkeri T.Esenalıevtiń shyǵarmashylyqty túzý jolyndaǵy ishki jobasy bolatyn.

Búgingi tańda 5-qazan kúni teatr óziniń kezekti 83-maýsymyn ashýǵa daıyndyq jasaý ústinde.