Bul joba kenet bastalǵan joq. Oner Portal 2022-2023 jyldary Almaty qalasynda «QAZAQ KINOSY: TOP 10 FILM» jobasyn júzege asyrdy. Bul shara aıasynda kıno synshylar men rejısserler eń úzdik dep sanaǵan 10 fılmdi kórermendermen birge qarap, sarapshylar talqylady. Joba kópshiliktiń kóńilinen shyqqanyn jáne qoǵamǵa qajettiligin eskere otyryp, AQSh Qazaqstandaǵy Dıplomatııalyq mıssııasy men “Shevron” kompanııasy ony jalǵastyrýǵa ary qaraı da qoldaý bildiretin boldy.
Kıno-talqyny jalǵastyrar tusta «QAZAQ KINOSY: TOP 10 FILM» jobasynan alǵan tájirıbemizdi Almatydan basqa qalalarǵa jetkizsek degen baılamǵa keldik. Ózara aqyldasa kelip Astana qalasy men Shymkent qalasyn tańdadyq. Joba keleside jalǵasyn taýyp jatsa aımaqtardaǵy qalalardy, ıaǵnı oblys ortalyqtaryn kezek-kezegimen qamtımyz degen nıetimiz bar. Astana men Shymkentte ótken talqylaýda spıkerlikke talqylanatyn fılmderdiń mazmunyna qaraı múmkindiginshe jergilikti zertteýshi mamandardy tarttyq.
Al joba aıasynda kórsetiletin fılmderdi tańdaýǵa barynsha mán berdik. Birinshiden aýdıtorııa úshin kókeıkesti máselelerdi kóteretin taqyryptar tańdaldy, ekinshiden rejısserdiń aıtar oıy, qundylyǵy jáne kıno estetıkasyna mán berildi, úshinshiden genderlik balansty saqtaýǵa nazar aýdaryldy. Jobanyń aty aıtyp turǵandaı BIZ KIMBIZ, ıaǵnı, sońǵy ýaqytta qoǵamda jıi talqylana bastaǵan kimdik (identity) uǵymyna kıno arqyly nazar aýdarýǵa jáne dıskýrs jasaýǵa tyrystyq.
Fılmderdi talqylaýda «bizdiń fılmder bizdiń qoǵamdy oqı alyp jatyr ma» degen suraqqa erekshe mán bere otyryp, identity suraǵyna jaýapty kúndelikti bolmysymyzdan izdedik. Buǵan spıkerlerimiz, sonymen qatar kórermender qandaı pikir qosqanyn tómendegi jazbalardan oqı alasyzdar.
QAZAQ KINOSY: BIZ KIMBIZ