Qyzyǵy men shyjyǵy mol stýdenttik shaqtarǵa ne jetsin? Áıtkenmen, bar álem qolyńda turǵandaı sezinip, taý men tasty tóńkererdeı kúshi bar óner jastarynyń akademııa qabyrǵasynan shyqqan soń qaıda tap bolyp, ózderin qalaı sezinetinine eshkim bas qatyryp jatqan joq. Árıne, ustazdar berer bilimin berdi, endi sonyń esebin taýyp, eresek ómirde qanshalyqty iske jaratýyn túlekterdiń ózderinen artyq eshkim bilmes. 2016 jyly Nurgeldi Sadyǵulov sheberhanasynda montaj rejıssýrasy mamandyǵyn támamdaǵan Berik Jahanov bul suraqqa irkilmesten «óte jaman» dep jaýap qatty.
Eń aldymen saǵynatynyń akademııadaǵy erekshe atmosfera, bári de qarbalasyp ıdeıa, estetıka syndy joǵary bolmystarǵa, óner týdyrýǵa tyrmysady. Al qazir onyń eshqaısysyna da ýaqyt joq, «Men stýdentpin» degen syltaýlardy umytyp, kún kórýdiń amalyn taýyp, nesibe qýyp ketedi ekensiń. Dıplomdy qolyma alǵan soń men de qatty kúızeliske tústim, ári qaraı qaıda jyljıtynymdy bilmedim dese de bolady. Keıinnen telearnaǵa jumysqa ornalasyp kórdim, soraqysy, ol jaqta óner degendi eshkim aýzyna da almaıdy. Bastysy kadrdyń tazalyǵy, árbir buıymnyń óz ornynda jatýy ǵana mańyzdy. Kadr kórkemdigi, jaryq sekildi mańyzdy nárselerdi eskermek turmaq, pysqyryp ta qaramaıtyn jerde men uzaq qala almadym. Rejısser bolyp ornalasqanyma qaramastan, araǵa eki kún salyp ol jerden shyǵyp kettim. Qazirgi sátte beınebaıandar, jarnamalar men áleýmettik rolıkter túsirýmen aınalysamyn, bir sózben aıtqanda frılansermin dese de bolady.
Aıta ketetin jaıt, Berik Jahanov óziniń dıplomdyq jumysy «Erkek» atty fılmimen «Qyrǵyzstan qysqametrli fılmder mekeni» atty halyqaralyq kınofestıvalde «Úzdik rejıssýra» júldesine ıe boldy. Festıvalǵa 14 elden 14 rejısser qatysty. Asa aýqymdy bolmaǵanymen óte sapaly uıymdastyrylǵanyn jáne saıystan eń jaqsy ásermen oralǵanyn baıandaıdy jas ónerpaz. Beriktiń buǵan deıingi on shaqty qysqa metrli jumysy jaryq kórip, birnesheýi «Jas dıdar» syndy baıqaýlarǵa qatysqanyna qaramastan, óziniń alǵashqy kóńili tolatyn týyndysy retinde osy «Erkek» fılmin atady.
Kıno eń aldymen shynaıy bolýy kerek, al bul fılm tolyǵymen men jaıly. Akademııaǵa qujat tapsyrar kezde men ákemniń dúnıeden ótkenin estidim, jerleýge Qyzylorda qalasyna barýǵa týra keldi. Sol kezde men «eger de akademııaǵa túse qalsam, dıplomdyq jumysqa sol sátti túsiremin» dep ózime ant etkenmin. Alaıda 4 kýrs bitkennen keıin men 7 novelladan turatyn tamasha senarıı jazyp shyqqanmyn. Ol barsha ustazdarǵa, ásirese ózime qatty unaǵan bolatyn. Biraq merzimi taqalǵan saıyn bergen sózim sanamnan ketpeı qoıdy. Osylaısha «Erkek» dúnıege keldi. Al jeti novella qazirgi sátte tórtke aınalyp, odan ári óńdelý kezeńinen ótip jatyr.
Óziniń bolashaqqa josparlary jaıly suraqqa Berik Jahanov izdenisin toqtatpaıtynyn, ýaqtysy kelgende barynsha shynaıy fılmin túsiretinin málimdedi. Iske sát!
[video width="1280" height="720" mp4="https://www.oner.kz/content/uploads/2017/05/Berik-Zhakhanov-showreel-2016.mp4"][/video]
