Óner jolyna kelýińizge kim nemese ne yqpal etti? Teatr ónerine kelýińizge ne sebep boldy?
Óte keremet suraq! Árıne, búgingi kúnim, bul – Allanyń bergen úlken bir syıy dep oılaımyn. Meniń ónerge degen mahabbatym kishkentaı kezimnen oıanǵan.
Suhbattarymda aıtyp júremin, 5 jasymnan bastap men úı jınaǵanda (qap-qara uzyn shashymdy jaıyp tastap) úıdi tóbeden kınoǵa túsirip jatyr dep oılaıtynmyn. Sosyn men bastaýysh synyptan bastap án aıta bastadym, mekteptegi belsendi oqýshylardyń qatarynan boldym. Óner úıirmeeleriniń bárine qatysatynmyn, túske deıin sabaq oqysam tústen keıin baryp mekteptegi úıirmelerdiń bárine qatysyp shyǵatynmyn. Dombyraǵa qyzyǵýshylyǵymdy baıqaǵan ákem, 3-synypta oqyp júrgenimde bir bóreneden dombyra jasap bergen. Keıin uly aktrısa bolǵanda óz mýzeıimde sol dombyrany saqtap qoıam dep oılaǵam. Ókinishke oraı, kóship qonyp júrgenimizde ol dombyra jańbyrdyń astynda qalyp, aqyry qurtylyp qaldy. Keıin, 6-7 synypta júrgenimde ákem daýysy keremet dombyra alyp berdi. Endi, aldaǵy ýaqytta óz mýzeıim bolyp jatsa, sol jerde osy dombyrany saqtap qoıatyn oıym bar.
Men 10-synypqa kelgende ádebıet sabaǵynyń ustazy «Eńilik - Kebek» qoıylymynan úzindi qoıyp, sol jerge meni Eńilik roline aldy, sonan meniń teatrǵa degen mahabbatym ashyldy. Sol kezden men teatr aktrısasy bolatynymdy sezdim. Biraq men teatr aktrısasynyń oqýy Qazaqstanda joq dep oılaıtynmyn. Ol tek Máskeýde ǵana bar degen oı boldy. Teatr qoljetpes bop kórinetin. Sodan keıin, Ál-farabı atyndaǵy Qazaq ulttyq ýnıversıtetine qazaq tili ádebıetiniń oqýyna (fılologııa fakýltetine) tapsyrdym. Biraq úsh ball jetpeı men oqýǵa túse almadym. Bir jyl boıy ózimniń jeke isterimmen aınalystym.
Sol jyly T.Júrgenov atyndaǵy Qazaq ulttyq óner akademııasynyń «Mýzyka óneri» fakýltetin Sáken Maıǵazıevpen bir kýrsta oqyǵan anamnyń Albına degen sińilisi aıaqtap jatqan edi. Bir keshte kezdesken anamnan meniń akterlik ónerge qyzyǵatynymdy, án aıtatynymdy jáne «meniń oqýymnyń tek Máskeýde ǵana» ekenin estigende, ol kisi ózimizdiń akademııaǵa, «mýzykalyq drama» mamandyǵyna barýyma keńes beredi. Kelesi kúni akademııaǵa ertip kelip, dıplomdyq memlekettik emtıhandy qalaı tapsyryp jatqanyn kórsetti. Sol kezde Sáken Maıǵazıev aǵamyz úsh án aıtty, aǵamnyń ánderin kózime jas alyp tyńdadym. Oqýǵa tapsyrýǵa kelgenimde, marqum Jaılaý Aqshabaıuly meniń boıymdy ólshep, shashymnyń buıralyǵyna qyzyǵyp, emtıhan tapsyrýǵa ruqsat qaǵazyn berdi. Ónerge degen qulshynysym osylaı bastalǵan.
Árbir óner adamynyń óziniń súıikti shyǵarmasy bolady. Sizdiń teatr sahnasynda qaı roldi súıip oryndaısyz?
Qatty súıip oryndaıtyn rolderim ol – Fatıma, «Qyzyl oramaldy shynarymdaǵy» – Ásel jáne «Qara shekpendegi» – Sylań! Bul úsheýi – úsh túrli, janjaqty obrazdar. Mysaly, Fatıma anamyzdyń obrazy óte tereń tragedııa! Óte aýyr rol! Ásel de tereń oı salatyn rol, al Sylań ol – maǵan basqa qyrymnan ashylýǵa jol ashqan rol, ony shyǵarmas buryn biraz qınaldym. Biraq, eńbek pen izdenistiń arqasynda ol rolge kórermen jaqsy baǵasyn berip jatyr. Kelinder kóterilisindegi Nıgora bolsyn, jalpy, teatrdaǵy barlyq rolderimdi jaqsy kóremin biraq ishinde eń súıiktisi osylar!
Eliktegen tulǵańyz kim boldy?
Osy kúnge deıin eliktegen adamym bolmapty. Bul durys pa, burys pa izdenip kórý kerek eken. Kınoda kórgen aktrısalarym bar. Kınony izdep qaraǵan kezde akterlik oıynǵa nazar aýdaryp, ózime azyq alamyn. Biraq eshkimge eliktemeppin. Múmkin, amandyq bolyp jatsa, aldaǵy ýaqytta bolatyn shyǵar.
Siz ózińizdiń boıyńyzdaǵy talant pen sheberlikti osy kezge deıin qanshalyqty deńgeıde kórsete aldyńyz?!
Qandaı rol berilse, sol rolge ózimniń barlyq múmkinshiligimdi salyp, ol roldiń tóńireginde barynsha izdenip, sol roldi alyp shyǵamyn. Eshnársege ústirti qaraǵan emespin. Kórermen aldynda oınaǵan kezde de barymdy salyp oınaımyn. Biraq, negizi áli de ashylmaǵan qyrlarym bar, ol meniń oınamaǵan rolderime baılanysty. Mysaly, áli komedııa janrynda oınamadym. Lırıkany - barynsha oınadym.
Aldaǵy ýaqytta qandaı rolderdi oryndaǵyńyz keledi?
Aldaǵy ýaqyttaǵy meniń armanym – plastıkaǵa qurylǵan qoıylym oınaǵym keledi. Sahnada kórermenmen betpe-bet bir saǵat boıy ońasha qalyp, sózden isi kóp qoıylym oınaǵym keledi. Sol qoıylymǵa qazir materıal izdep júrmin. Senarıstpen jumys istep, ony bir rejısserge qoıdyryp, sol qoıylymmen festıvalderge shyqqym keledi. Osyndaı bir úlken armanym bar.
Aldaǵy ýaqyttaǵy josparlaryńyzben bólisseńiz...
Qazir biz, rejısser Juldyzbek Jumanbaı bastaǵan shyǵarmashyl top, «Bazar qutty bolsyn» degen qoıylym daıyndaý ústindemiz. Sol jerde maǵan Maıra Ýálıqyzy degen keıipkerdiń beınesin somdaý buıyrdy, sonymen jumys istep jatyrmyn. Maýsymnyń ortasyna qaraı, úlgerip jatsaq, kópshilik nazaryna usynamyz degen oıymyz bar. Bul bir úlken shoý baǵdarlama bolady. Bul bizdiń teatrdyń tarıhynda eń alǵash bolyp jatqan dala qoıylymy. Bul teatrdyń ishinde emes, syrtta bolatyndaǵymen erekshe bolyp tur. Qazir ujym bolyp osy qoıylymmen jumys istep jatyrmyz.
Shilde aıynda EKSPO-ǵa baryp kelgen soń, demalys kezinde ózimniń jeke ánderimdi jazdyrtsam degen oıym bar. Buıyrtsa, bári retimen bolady degen oıdamyn.
Suhbatyńyz úshin kóp raqmet!
