Oleg Belıalovtyń jańa týyndysy álemdegi eń tanymal ári súıikti gúl – qyzǵaldaq týraly baıandaıdy. Fılm tamyry tereńge tartatyn erekshe gúlge arnalady.
- Tamasha fotograf Oleg Belıalovty kezinde rejısser bolýǵa kóndire alǵanyma qatty qýanam. Ol úshin bul mańyzdy sheshim boldy. Al búgin mine, biz onyń fılmin tamashalaýǵa jınalyp otyrmyz, - dedi fılm bastalar aldynda sóz alǵan «Qazaqfılm» kınostýdııasynyń prezıdenti Baqyt Qaıyrbekov.
Sondaı-aq, Baqyt Qaıyrbekov rejısserdiń birinshi týyndysy «Altynemel» Qytaıdyń Taıchjoý qalasynda ótken kıno men týrızm salasyndaǵy Azııa óneri aptalyǵynda úzdik shetel derekti fılmi atalymynda alǵan prızin tabystady. Aıta ketelik, Oleg Belıalovty Qazaqstan kınematografıster odaǵy ulttyq «Qulager» premııasynda úzdik rejısser-dokýmentalıst dep tanyǵan bolatyn.
- Qansha jyl fotografııamen aınalysqam jáne ol úshin eshqashan júlde almaǵan edim. Al búgin bul prızdi alyp otyrǵanyma qatty qýanyshtymyn, - dedi rejısser Oleg Belıalov.
«Qyzǵaldaqtar atamekeni» fılminiń túsirilimderi Almaty, Jambyl, Túrkistan jáne Ortalyq Qazaqstan oblystarynda júrgen. Sonymen qatar, rejısserdiń aıtýy boıynsha, fılmde arhıvtik materıaldar qoldanylǵan.
- Kópshilik qyzǵaldaqty Gollandııamen baılanystyrady. Alaıda, bul gúldiń otany – Qazaqstan. Prezıdent Nursultan Nazarbaev «Uly dalanyń jeti qyry» atty maqalasynda qyzǵaldaq taqyrybyn qozǵaǵany meni qýantyp otyr. Óıtkeni, bul gúlder bizdiń muramyz, maqtanyshymyz, brendimiz. Olardy qadirlep, qorǵaýymyz kerek, - dedi fılmniń ǵylymı keńesshisi Anna Ivaenko.
Fılmniń sońynan kórermender tolassyz qol shapalaqtap, fılm jaıly pikirlerin ortaǵa saldy.
Senarıı avtory ári qoıýshy rejısseri: Oleg Belıalov
Qoıýshy operatory: Oleg Belıalov
Dybys operatory: Ádil Doskempirov
Montaj rejısseri: Natalıa Ryblova
Rejısser týraly aqparat:
Oleg Belıalov 1960 jyly Almatyda 23 tamyz aıynda dúnıege kelgen. Alǵashqy fotografııalaryn «Smena-7» fotoapparatymen 1970 jyldary jasaǵan. Sol kezde jabaıy tabıǵatqa dáne qustardy fotoǵa túsirýge degen qyzyǵýshylyǵy bastalǵan. 1984 j. men 1987 j. – «Qazaqfılm» kınostýdııasynyń operator assıstenti bolyp istegen. Kóptegen zoologııalyq ekspedıııalar men fılmder túsiriliminde jáne Qazaqstan tabıǵaty týraly fotoalbom jasaýǵa qatysqan.
