Derekti fılmderdiń ıkly Qazaqstanda turatyn túrki halyqtary týraly baıandaıdy. Ár fılmde bir ulttyń ókilin basty keıipker etip kórsetý arqyly sol ulttyń ózindik erekshelikteri men salt-dástúri sýrettelgen. Barlyq fılmderdi qoıýshy rejısserler, sonymen qatar shyǵarmashylyq toptyń ókilderi tanystyrdy.
Kórsetilim «Tústiń dámi» atty derekti fılmmen ashyldy. Derekti týyndy Venera Vajıtova esimdi jas sýretshi jáne kıim dızaıneri týraly baıandaıdy. Fılmniń túsirý toby bas keıipkermen birge onyń týyp ósken Shonja aýylyna baryp, uıǵyr halqynyń mádenıeti men turmys tirshiligi týraly kóp málimet alady. Kórsetilimnen keıin fılmniń rejısseri Kamılla Ábdeldinova kórermenderge túsirý tobyn tanystyryp, olarǵa alǵysyn aıty.
Al «Jip» atty derekti fılm tatar ultyna arnalǵan. Tatar ulttyq kıimderin tigýmen aınalysatyn Vadıga Galımbaeva esimdi keıipker Qazan qalasyna baryp, óz ultynyń tarıhy men mádenıetimen jaqyn tanysady. Kórsetilimnen keıin fılmniń rejısseri Nadıra Sadýova shyǵarmashylyq topqa, sonymen qatar, qoldaý bildirip, fılmdi shyǵarýda atsalysqan óziniń ustazy Ásııa Baıǵojınaǵy alǵys bildirdi.
«Chývash halqy. Qazaqstan – meniń ekinshi otanym» derekti fılmin jas rejısser Dınara Manabaeva tanystyrdy. Fılmde Pavlodar oblysy chývash halqynyń qoǵamdyq-mádenı ortalyǵynyń ókili Marııa Sımýlınanyń ómiri baıandalady. Joldasymen birge Qazaqstanǵa kezdeısoq kelgen ol, osy jerde qalyp, ósip-ónedi.
Marııa túrki tildes halyqtarynyń eń az, tipti joǵalyp ketý qaýpinde turǵan etnostardyń biri – chývash hylqynyń ókili. Soǵan qaramastan, Marııa ózi syndy qurbylarymen birge chývash hylqynyń mádenıeti men tilin saqtaýda eńbek etip júr. Keıipkerdiń óz qolymen jasaǵan chývash halqynyń ulttyq bas kıimi nemese týǵan aýylyn beınelegen kestesi arqyly onyń týǵan jerine degen saǵynyshyn birden baıqaýǵa bolady.
-Bul fılm men úshin úlken jańalyq boldy, - dedi Áset Ernazarov, Sh.Aımanov atyndaǵy «Derekti fılmder» ShB jetekshisi.
Kesh sońynda jaqynda ǵana Almatyda ótken «Bastaý» halyqaralyq kınofestıvalinde Oraz Ábishev atyndaǵy «Úzdik derekti fılm» júldesimen marapattalǵan «Ata kásip» fılmi kórsetildi.
Derekti fılm Ońtústik Qazaqstan oblysynda turatyn ózbek halqynyń ókili, ata kásip – besik jasaýmen aınalysatyn qyryq jeti jasar Abdımannop Zýparov esimdi sheberdiń ómirin baıandaıdy.
«Bizdiń nıetimiz taza. Qazaqstandyqtardyń sany ósip jatsa, bizdiń jumysymyz, jeıtin nanymyz bolady. Osyndaı taza, pák nıetimizben qolónermen aınalysyp kelemiz», - dedi fılmniń keıipkeri.
Fılmde besiktiń qalaı jasalatyny, sondaı-aq ózbek halqy sábıdi besikke qalaı bóleıtini kórsetiledi.
Derekti fılmdi kartınanyń túsirý toby tanystyrdy. Fılmniń senarıı avtory Farıza Jahanova, bul fılmdi túsirmes buryn eki keıipkerdiń bolǵanyn jáne senarııdi jazý barysynda Abdımannop aǵanyń otbasyna toqtalǵandaryn aıtty.
- Búgin kórsetilgen barlyq fılmderdiń kórkemdik jetekshisi Áset Ernazarovqa, «Qazaqfılm» basshylyǵyna jáne mádenıet mınıstri Arystanbek Muhamedıulyna alǵysymyzdy aıtamyz. Osy kisiniń arqasynda jas kınogerler óziniń fılmderin túsirýge jáne kásibı sheberlermen birge jumys isteýge keń múmkindik alyp otyr, - dedi fılmniń dırektory Baný Ramazanova.
Kórsetilimge kelgen qonaqtar – fılmderdiń bas keıipkerleri, dıaspora ókilderi jáne stýdentter, fılmderdiń avtorlaryna alǵystaryn aıtyp, shyǵarmashylyq tabystar tiledi.
