Sháken Aımanov fılmderi YouTube-ta

Sháken Aımanovtyń fılmderin endi "Qazaqfılmniń" YouTube jelisindegi resmı arnasynan kórýge bolady.
Sháken Aımanov fılmderi YouTube-ta

«Qazaqfılm» kınostýdııasy qazaq kınosynyń sańlaǵy, KSRO halyq artısi Sháken Aımanovtyń týǵan kúnine oraı has sheberdiń akterlik jáne rejısserlik jumystaryn YouTube jelisindegi óziniń resmı arnasyna júktep qoıdy.

– 15 aqpan – elimizdiń kınogerleri úshin erekshe kún. Búgin aty ańyzǵa aınalǵan Sháken Aımanovtyń týǵan kúni. Kınostýdııanyń resmı áleýmettik jelilerinde otandyq fılmderdi ǵalamtordan qalaı kórýge bolatyny týraly jıi suraıdy. Biz YouTube jelisindegi arnamyzdy únemi jańartyp otyrýǵa tyrysamyz. Sondyqtan da, qazaq kınosynyń klassıgi Sháken Kenjetaıuly qatysqan barlyq fılmderdi YouTube jelisine júktep, barlyq qazaqstandyqtarǵa osyndaı syılyq jasaýdy sheshtik, - dedi «Qazaqfılm» kınostýdııasynyń prezıdenti, Qazaqstannyń eńbek sińirgen qaıratkeri Arman Ásenov.

Sháken Aımanov kıno álemine 1938 jyly keldi. Dál sol jyly ol qazaqtyń tuńǵysh dybysty fılmi «Amangeldi» kartınasynyń epızodynda túsken bolatyn. Odan keıin akter «Raıhan», «Aq Raýshan», «Abaı ánderi», «Altyn múıiz», «Jambyl», «Biz osynda turamyz», «Bizdiń súıikti dáriger», «Bir aýdanda», «Aldar-kóse» jáne «Qıylys» fılmderine túsken.

1954 jyly Aımanov rejısser retinde óziniń alǵashqy fılmin túsirdi. Jalpy óziniń shyǵarmashylyq jolynda ol 11 kórkem týyndy jasap shyǵardy, olar:  «Dala qyzy», «Mahabbat týraly dastan», «Biz osynda turamyz», «Bizdiń súıikti dáriger», «Bir aýdanda», «Án shaqyrady», «Qıylys», «Aldar kóse», «Atameken», «Taqııaly perishte» jáne «Atamannyń aqyry». Búginnen bastap bul fılmderdiń barlyǵyn «Qazaqfılm» kınostýdııasynyń YouTube jelisindegi arnasynan kórýge bolady.

Odan bólek, «Qazaqfılm» kınostýdııasy qazaq kınosynyń altyn qoryna engen basqa da fılmderdi óziniń YouTube jelisindegi resmı arnasyna júkteýdi josparlap otyrǵanyn aıta ketken jón.

Esterińizge sala ketsek, byltyr qazan aıynda resmı YouTube arnasyna táýelsizdik jyldary jaryq kórgen 4 tolyqmetrli jáne 15 qysqametrli anımaııalyq fılmder júktelgen bolatyn.