Qazirgi tańda fılmniń óndiristegi aǵyrǵy etapy montajdaý kezeńi júrip jatyr. Atalmysh tarıhı týyndy ánshi jáne kompozıtor, aty ańyzǵa aınalǵan balýan Balýan Sholaq týraly baıandaıdy. Fılm rejısser Nurgeldi Sadyǵulovtyń kórkem fılmdegi alǵashqy qadamy.
– Qazir montajdy bitirgeli otyrmyz. Montaj – fılmniń úshinshi jáne sońǵy ret týylatyn sáti. Montajǵa kóp ýaqytym ketti, sebebi túsirilgen materıal aýqymdy ári qyzyqty. Montajdyń sońǵy nusqasyn ''Qazaqfılmniń'' Eksperttik keńesine kórsetemiz. Sodan keıin ǵana dybystaý jumystary, grafıka jáne tústeý jasaımyz, – dedi Nurgeldi Sadyǵulov.
Sondaı-aq, rejısser Býrabaıda ótken túsirilimder týraly da sóz etti: Kókshetaýdaǵy túsirilimder óte sátti ótti dep oılaımyn, sebebi men úshin tabıǵat taptyrmas akter. Túsirilim kezinde jańbyr jaýyp, boran boldy. Soǵan qaramastan túsirilim toby da, akterler de bir adamdaı jumys istedi. Sonyń arqasynda aldymyzǵa qoıǵan maqsatymyzǵa qol jetkizdik. Montajdap bolǵan soń, epılog kerek degen sheshim qabyldadym. Fılmniń epılogyn túsirsek, fılm áserli bolady ári taqyryp keńinen ashylady dep senemin.
Fılmniń túsirilimderi Almaty oblysy, Pavlodar qalasy jáne Býrabaıda ótken. Almaty oblysy, Kegen jáne Jalańash aýyldarynda fılmniń negizgi bóligi túsirilgen. Kópshilik sahnalarǵa úsh júzge jýyq adam qatysqan. Rejısserdiń aıtýy boıynsha, fılmde kompıýterlik grafıka kóp jasalady. Kórermen qaýymnan biraz aqparatty jasyryp qalǵysy kelgen rejısser bul jóninde kóp toqtalmady. Dese de, rejısser fılmdi túsirýdegi basty maqsaty jaıynda aıtyp qaldy: Eń bastysy men úshin Balýan Sholaqtyń beınesin úlken ekranǵa ákelý jáne sol dáýirdi kórsetý. Qanshalyqty sátti nemese sátsiz shyqqanyn ekran kórsetedi. Túsirilgen materıal júz paıyzǵa unaıdy dep aıta almaımyn. Keıde montajdan ashýmen ketemin, keıde qýanyshpen shyǵamyn. Akterler baryn saldy. Dese de, Balýan Sholaqtyń rólindegi Erkebulan Daıyrov, Aqylbaıdy somdaǵan Medǵat Ómirálıev pen Dolgonosovty oınaǵan Aleksandr Bagrıanevti erekshe atap ótkim keledi.
Aıta keteıik, fılmge eki birdeı treıler jáne eki saýndtrek ázirlenip jatyr. Shyǵarmashylyq top olardy jaqyn arada kórermen nazaryna usynady. Fılm jyldyń sońynda kórermen nazaryna usynylady dep josparlanýda.
Derekkóz: www.kazakhfilmstudios.kz
