Búgin, 27 qańtarda Abý-Dabıdegi «Manarat al Saadııat» mádenı ortalyǵynda Qazaqstan kınosy kúnderiniń ashylý saltanatynda rejısser Doshan Joljaqsynovtyń «Qunanbaı» fılmi kórsetiledi. Qazaqstan Respýblıkasynyń Prezıdenti Qasym-Jomart Toqaevtyń Birikken Arab Ámirlikterine resmı sapary aıasynda uıymdastyrylǵan mádenı is-sharany Sh.Aımanov atyndaǵy «Qazaqfılm» AQ, QR Mádenıet jáne sport mınıstrligi men Qazaqstannyń Birikken Arab Ámirlikterindegi Elshiliginiń qoldaýymen uıymdastyrylyp otyr.
Sondaı-aq búgin «Qazaq bıi» derekti fılmi kórsetiletinin aıta ketetin jón. Bul týyndynyń rejısserleri – Anvara Sadyqova jáne Ǵazız Nasyrov. Derekti fılmde jas balerına, A.Seleznev atyndaǵy Almaty horeografııa ýchılıesiniń stýdenti, halyqaralyq baıqaýlardyń laýreaty Janel Ulanovanyń óneri arqyly qazaq bıiniń tarıhy baıandalady.
Al erteń, 28 qańtarda rejısser Rústem Ábdirashevtiń «Qazaq handyǵy» tarıhı kınodıologııasynyń eki birdeı maýsymy – «Almas qylysh» jáne «Altyn taq» fılmderi usynylady. Bul týyndylardyń senarıi Ilııas Esenberlınniń «Kóshpendiler» trılogııasynyń «Almas qylysh» atty birinshi romanynyń negizinde jazylǵan.
Qazaqstan kınosy kúnderiniń sońǵy kúni, 29 qańtarda rejısser Aqan Sataevtyń «Elbasy joly. Astana» jáne rejısser Djeff Vespanyń «Ámire» fılmderi kórsetiledi.
Týyndylardyń barlyǵy qazaq tilinde (aǵylshyn tilindegi sýbtıtrmen) usynylatyn bolady.
