Almatyda rejısser Jeńishan Momyshevtyń «Bıznes po-kazahskı» komedııasynyń aldyn-ala kórsetilimi ótti. Fılmniń bas prodıýseri – belgili telejúrgizýshi Nurlan Qoıanbaev.
"Bizdiń fılmge úndi akteri Sıddharth Shýkla ("Kelin" serıalynyń juldyzy) tústi. Biz Sıddharthaǵa fılmge túsýge usynys tastaǵanymyzda, ol ózine Qazaqstannyń qatty unaǵanyn, sondaı-aq, shetelde birinshi ret fılmge túskenin aıtty.
Keıbireýler "qazaqsha" degendi teris uǵyp jatady. Al meniń oıymsha, "qazaqsha" degen sózdiń maǵynasyn qonaqjaı ári keńpeıildi dep qabyldaıtyn ýaqyt jetti. Ár óńir óz mentalıtetimen erekshelenedi. Sol sebepti de óz mentalıtetińnen, bolmysyńnan uıalýdyń qajeti joq", - dedi Nurlan Qoıanbaev.
Sonymen qatar, fılmge Bollıvýd juldyzynan basqa, otandyq akterler de túsken. Olardyń qatarynda, Jan Baıjanbaev, Gúlnaz Jolanova, Ábýnasyr Serikov, Quralaı Anarbekova, Maksım Akbarov jáne ánshi Tóreǵalı Tóreáli bar. Senarıı avtorlary: Álısher Ýtev jáne Arystan Kaýnev.
Jalpy kınokomedııanyń sıýjeti boıynsha, Jomart esimdi kásipkerdiń qanaqúıine iri ınvestor qyzyǵýshylyq tanytady. Qonaqúıdiń ashylý saltanatyna jaqyndaǵan tusta, barlyq qyzmetkerler jumystan shyǵyp, oqıǵa shıelenise túsedi. Osylaısha, járdemdesýge kelgen Jomarttyń jaqyndary «qazaqsha bıznestiń» jasalý jolyn kórsetedi.
Atalmysh fılm jeltoqsan aıynyń 29 juldyzynan bastap elimizdiń barlyq kınoteatrlarynda kórsetiletin bolady. Jaryq juldyzdarmen tolysqan jańa týyndy – jurtshylyqqa jaqsy áser beredi degen senimdemiz.
Aıjan ESENGELDI
Aqparat, Kaz.tengrinews.kz saıtynan alyndy.
Tolyǵyraq: https://kaz.tengrinews.kz/cinema/nurlan-koyanbaev-kazaksha-biznestn-kalay-jasalatyinyin-275954/
