28-aqpan saǵat 15:00-de Ermek Tursynovtyń kınoklýbynda Sh.Aımanov atyndaǵy "Qazaqfılm" AQ usynǵan "Káýkenniń juldyzy" atty derekti fılminiń tusaýkeseri ótedi. Senarıı avtory jáne rejısser Ǵazız Nasyrov. Fılm qazaq tilinde.
Fılm túsirilý barysynda sırek arhıv materıaldary, Káýken Kenjetaevtyń týǵan jerindegi túsirilimder, sonymen qatar, Asanáli Áshimov, Bıbigúl Tólegenova jáne ózge de tanymal tulǵalardan alynǵan suhbattar paıdalanylǵan. Kezdesýdi rejısser Ermek Tursynov júrgizedi.
Derekti fılm qazaq kınosynyń negizin qalaǵan Sháken Aımanov, Májit Begalın, Sultan Qojyqov jáne Abdolla Qarsaqbaev syndy rejısserlerdiń ónerdegi úzeńgilesi, opera ánshisi, kınoakter, jazýshy, aýdarmashy, professor, Tarlan syılyǵynyń laýreaty, Sh.Aıtmatov atyndaǵy halyqaralyq premııasynyń laýreaty Káýken Kenjetaevtyń ómiri men shyǵarmashylyǵy týraly baıandaıdy.
Káýken Kenjetaev (1916–2008) – kıno akteri, opera ánshisi, opera teatrynyń rejısseri, jazýshy, professor, Qazaq SSR-nyń Halyq ártisi (1959).
Teatrdaǵy eńbegi
1946 jyldan bastap Káýken Kenjetaev Abaı atyndaǵy akademııalyq opera jáne balet teatrynyń solısi. 1958 jyly Máskeýdegi qazaq óneri dekadasynyń qatysýshysy. Opera ánshisi retinde:
"Er Tarǵyn" operasynda (E.Brýsılovskıı) – Er Tarǵyn;
"Jalbyr" operasynda (E.Brýsılovskıı) – Jalbyr;
"Qyz Jibek" operasynda (E.Brýsılovskıı) – Bekejan;
"Birjan – Sara" operasy (M.Tólebaev) – Janbota;
"Karmen" operasy (J.Bıze) – Eskamılo;
"Rýslan men Lıýdmıla" operasy (M.Glınka) – Rýslan syndy obrazdardy sahnaǵa alyp keldi. Abaı atyndaǵy Qazaq memlekettik akademııalyq opera jáne balet teatrynda Qazaqstan Respýblıkasynyń opera óneriniń altyn qoryna engen kóptegen sahnalyq obrazdardy jasap shyqty.
Sonymen qatar, Káýken Kenjetaev teatrda rejısserlik talantynyń múmkindikterin de keńinen ashty. Operalyq qoıylymdarynyń ishinde:
E.Brýsılovskıı "Amangeldi", "Er Tarǵyn", "Qyz Jibek", "Jalbyr";
T.Muhamedjanov "Aısulý";
E.Rahmadıev "Alpamys";
P.I.Chaıkovskıı "Pıkovaıa dama" – operalary bar.
Káýken Kenjetaev 1957 jyldan bastap kınoǵa keldi.
Fılmografııa:
Volga-Volga (1938)
Bizdiń súıikti dáriger (1957) – mılııoner
Tulpardyń izimen (1964) – Tanabaı
Án qanatynda (1966) – Nurtaza (dybystaǵan Mıhaıl Glýzskıı)
El basyna kún týsa (1967) – Baýyrjan Momyshuly
Balalyq shaqqa saıahat (1968) – Uzaqbaı (dybystaǵan Borıs Kordýnov)
Mánshúk týraly án (1969)
Qyzyl tas zastavasynda (1969) – qart
Qyz Jibek (1970) – Bazarbaı (dybystaǵan Iakov Belenkıı)
Belyı kvadrat (1970) – Sultan Sergalıuly
Rodnık (1974)
Otqan oranǵan Oral (1974)
Gaýhartas (1975) – áke
Poslednıı god Berkýta (1977) – Hoortaı
Borandy beket (1995)
Káýken Kenjetaev T.Júrgenov atyndaǵy Qazaq ulttyq óner akademııasynyń professory. "Mýzykalyq komedııa" kafedrasynyń negizin salýshy. Shákirtteri Maıra Ilııasova, Qydyráli Bolmanov, Erbol Kókeev, Gúlbaýshan Tileýbekova, Aıgúl Imanbaeva syndy qazaq sahnasynyń maıtalmandaryn tárbıelep shyǵardy.
Káýken Kenjetaev 1980-2004 jyldar aralyǵynda artıst shyǵarmashylyǵyna, ónerge, ózniń áriptesterine, dostaryna jáne óziniń týǵan aǵasy Sháken Aımanovqa arnalǵan kóptegen eńbek jazdy:
"Darhan daryn" 1980, "Kınorejısser Májit Begalın" 1994, "Asyldar men ardaqtylar" 2002, "Sýretter sóılegende" 2004 t.b.
Sonymen qatar, álemge tanymal "Sılva" (I.Kalman) jáne "Fıgoranyń úılenýi" (Dj.Rossını) operalaryn qazaq tiline aýdarǵan.
"Alpamys" (E.Rahmadıev) operasyna, "Aldar kóse" (T.Muhamedjanov) operasyna jáne "Qusnı-Qorlan" (T.Muhamedjanov) mýzykalyq komedııasyna lıbretto jazǵan.
Káýken Kenjetaev 2008 jyly 92 jasynda dúnıeden ozdy.
