Qazybek bıdiń 350 jyldyq
mereıtoıyna oraılastyrylǵan bul derekti týyndy «Bolashaqqa baǵdar: rýhanı
jańǵyrý» baǵdarlamasy aıasynda túsirilgen.
Fılmniń senarıı avtorlary ári rejısserleri
dramatýrg, rejısser Ǵazız Nasyrov pen kınodramatýrg, ónertanýshy Erlan Tóleýtaı.
Avtorlar buǵan deıin shyǵarmashylyq birlestikte «Mádı Bápıuly» jáne «Táttimbet
Qazanǵapuly» atty derekti fılmderdi túsirgen.
Əýeli Qaraǵandy oblysyn kókteı ótip, sonan soń Pavlodar
oblysyna shyqtyq. Bul ólkelerde Qazybek bı babamyzdyń tabanynyń izi
qalǵan. Sondaı-aq, Ońtústik Qazaqstan men Qyzylorda oblystarynda da
túsirilimder júrgizdik. Sonan soń, Astana asyp, Qaz daýysty Qazybek bıdiń ómiri
men qoǵamdyq qyzmetin zerttegen ǵalymdarmen suhbatastyq. Uly bıden qalǵan
jalǵyz jádiger - altyn zerli shapandy taspaladyq. Qaıta aınalyp, Qaz daýysty
Qazybek bıdiń 350 jyldyq toıyna qatystyq, - dedi
senarıı avtory ári fılmniń teń rejısseri Erlan Tóleýtaı.
Fılmde Qytaı men
Reseıdiń muraǵatynan Qazybek bıge qatysty derekter men el aýzyndaǵy ańyzdar
qoldanylǵan. Tarıhı qujattarmen qatar, qoıylymdyq sahnalar engizilgen bul
fılmge elimizdiń teatr jáne kıno akterleri túsken. Qazybek bıdiń róline QR
eńbek sińirgen qaıratkeri, akter, Kereı han rólimen qalyń kórermenge tanylǵan Qaırat
Kemalov shaqyrylǵan. Sonymen qatar, fılmde Aldabek Shalbaev, Saıat Merekenov,
Ińkár Ábdirash, Zarına Kármen jáne Abylaı hannyń urpaǵy Abylaı Qashqynbaev ta boı
kórsetken.
Al fılmniń basty keıipkerleriniń biri - Qazybek bıdiń urpaǵy, belgili qoǵam
qaıratkeri, antııadrolyq qozǵalystyń belsendi múshesi, sýretshi Kəripbek Kúıikov.
- Qaz daýysty Qazybek bı 1764 jyly aqpan aıynda qaıtys
bolǵanda qys qaharly, qar qalyń bolǵandyqtan, jer aıaǵy keńigenshe dep balasy
Bekbolat pen Edige bıler uly bıdiń məıitin sórege saqtaýǵa uıǵarǵan. Osy qys
aıynda bolǵan oqıǵany sýretteý úshin Alataýdyń bir asqar bıigi - 3800 metrlik
"Molodejnyı" atalatyn bıik shyńyna shyǵyp, alty qanat úı tiktik.
Óıtkeni mezgil tamyzdyń sońy, Alataýǵa qar túsip úlgermegendikten, osylaı
jannan bezip, məńgi muzdyqtarǵa kóterilýge májbúr boldyq. Alataýdyń qulama
jartasty, túpsiz shyńyraýlarynan asyp ótkenimizdiń ózi bir ǵajaıyp hıkaıa, - dedi Erlan Tóleýtaı.
Óndirisi: Mádenıet jáne sport mınıstrliginiń
tapsyrysy boıynsha Sh.Aımanov atyndaǵy «Qazaqfılm» kınostýdııasy.
Senarıı avtorlary
ári rejısserleri: Ǵazız Nasyrov, Erlan Tóleýtaı
Qoıýshy operatorlary: Sapar
Koıchýmanov, Mars Ýmarov
Kompozıtory: Ábilqaıyr Jarashan
Kostıým jónindegi sýretshi: Aıgerim Saparova
Fılmniń montajyn jasaǵan: Sergeı Vılkovıskıı
Anyqtamalyq
aqparat:
Qazybek Keldibekuly – qazaq halqynyń
XVII – XVIII ǵasyrlardaǵy uly úsh bıiniń biri, kórnekti qoǵam jáne memleket
qaıratkeri. Ol 1667 jyly Syr boıynda dúnıege kelgen. Arǵy atalary Shanshar abyz,
Bulbul, óz ákesi Keldibek — esimderi elge belgili ádil bıler bolǵan.
Qaz daýysty Qazybektiń oqyǵan
jerleri, alǵan bilimi týraly naqty derek joq. Degenmen, el aýzyndaǵy áńgime,
ańyzdar men bıden jetken sheshendik sózder onyń óz zamanynda bilimdi de jeteli,
halyqtyń aýyz ádebıeti men salt-dástúr, rámizderin, ata joly zańdaryn meılinshe
mol meńgergen, ozyq oıly, ádil de kóregen, batyl da batyr adam bolǵandyǵyn
aıqyn ańǵartady. Ádildigi men alǵyrlyǵy úshin Táýke han Qazybekti Orta júzdiń
Bas bıi etken. Bı Áz Táýkeniń tusynda han keńesiniń beldi músheleriniń biri
bolsa, Sámeke, Ábilmámbet, Abylaı el bılegen kezeńderde de memleket basqarý
isine jıi aralasyp, ishki-syrtqy saıasatta aqyl-keńester berip otyrǵan.
Sondaı-aq, Tóle bı jáne Áıteke bımen
birlesip, halqymyzdyń ádet-ǵuryptaryna súıene otyryp «Jeti jarǵyny» shyǵarǵan.
derekkóz: "Qazaqfılm" veb-saıty
