19 qańtar kúni T.Júrgenov atyndaǵy Qazaq ulttyq óner akademııasynda kúıshi, qobyzshy, A.Jubanov atyndaǵy saz mektebiniń ustazy Saıan Aqmoldamen kezdesý ótti. Klýbtyń bul jolǵy kezdesýine Ramazan Stamǵazıev bastaǵan «Dástúrli án» kafedrasynyń ustazdary men stýdentteri jáne A.Jubanov atyndaǵy saz mektebiniń oqýshylary men ustazdary qonaq boldy. Kezdesý óte erkin formatta órbidi.
Saıan Aqmolda bala kezinen bastap dástúrli kúı ónerine qanyǵyp óskenin qyzyqty etip baıandaı otyryp, shertpe kúıdiń tarıhy týraly keńinen áńgime qozǵady. Kúı ónerin búgingi kúnge jetkizgen kúıshilerdiń taǵdyry men minezderi týraly aıtqandary kezdesýge kelgen qonaqtardyń árqaısysyna erekshe áser etti. Saıan Aqmolda óziniń ustazy kúıshi, qobyzshy Smaǵul Úmbetbaevtyń shyǵarmashylyǵy týraly da tilge tıek etti. Qonaqtar kókeılerinde júrgen suraqtaryn qoıyp, birneshe kúı oryndaýyn surady.
Kúıshi áńgime arasynda oryndaıtyn kúıiniń tarıhyn baıandap, qonaqtardy kúıge bólep otyrdy. Saıan Aqmolda joǵalyp bara jatqan kúılerdi jınaǵanyn, esimi belgisiz kóptegen sheber kúıshilerdi qalaı tapqanyn qyzyqty etip baıandap berdi. Dástúrli ónerimizdiń arhıvtegi saqtalyp qalǵan jádigerlerin jaryqqa shyǵarý jóninde sóz qozǵady. Arhıvtegi kóptegen tulǵalardyń saqtalyp qalǵan jazbalaryn taýyp, qázirgi ıfrlyq tehnologııaǵa kóshirilýine yqpal jasap júrgen Saıan Aqmolda bolashaqta kúılerin jınaqtap, arhıvke ótkizýin dástúrli óner jolyndaǵylarǵa qulaqqaǵys jasady.
Kezdesý sońynda Saıan Aqmoldanyń shákirti, ózi ustazdyq etip júrgen A.Jubanov mektebiniń 11-synyp oqýshysy Smaǵul Ásenniń qobyzben oryndaýynda, Yqylastyń kúıi "Aıraýyqtyń ay kúıimen" aıaqtaldy.
Qonaqtar men klýb músheleri ádettegideı fotosýretke túsip, tarıhqa taǵy bir iz túsirip tarasty.
