Elordanyń 20 jyldyǵy men «Rýhanı jańǵyrý» baǵdarlamasy aıasynda «Astana Musical» teatry Almatyda óz gastrolin bastamas buryn, talaı ónerpazǵa qanat bitirgen, óner men bilimniń qara shańyraǵyna aınalǵan T.Júrgenov atyndaǵy Qazaq ulttyq óner akademııasyna arnaıy keldi.
Shyǵarmashylyq kezdesýge QR Tuńǵysh Prezıdenti Qory syılyǵynyń Laýreaty, akter, rejısser – Eslám Nurtazın, jas rejısser – Aman Gýmarov jáne mıýzıkl qoıylymdarynda basty rólderdi somdaýshy akterler, Respýblıkalyq jáne Halyqaralyq baıqaýlardyń laýreattary Shalqarova Jarqynaı, Muqashev Salamat, Rızabekova Inabat, Ýsmanov Rasýl taǵy da basqa bir top oryndaýshylar qatysty. Olar 2017 jylǵy jeltoqsan aıynda Franııa, Belgııa, Avstrııa, Reseı memleketterindegi gastroldik sapary jaıynda jáne oınaǵan rólderi men sahnalaǵan qoıylymdary týraly syr shertip, alǵa qoıǵan josparlarymen bólisti. Zaldaǵy kórermenderdiń saýaldaryna jaýap berý arqyly óz oılary men tájirıbelerin ortaǵa saldy.
Bul is-sharada Ortalyq Azııadaǵy tuńǵysh mamandandyrylǵan «Astana Musical» teatrynyń repertýary az ýaqytta otandyq jáne álemdik mıýzıkldarmen tolyǵyp, zamanýı baǵytqa negizdelgeni baıqaldy. Sonymen qatar 23-27 naýryz aralyǵynda Almaty qalasynda «Astana Musical» teatrynyń gastroli M.Áýezov atyndaǵy Qazaq memlekettik akademııalyq drama teatrynda ótetini jaıynda habardar etti. Olar dúnıejúzine belgili mıýzıkl – «Romeo men Djýletta» qoıylymyn 23, 24, 27 naýryz kúnderi kórsetse, 25-shi naýryzda «Dostar serti» mıýzıklin, al 26 kúni ulttyq opera men klassıkalyq mýzykanyń injý-marjandary negizinde jasalǵan «Qyz Jibek» etno-folklorlyq mıýzıklin jurtshylyqtyń nazaryna usynady. Atalǵan barlyq qoıylymdardyń bastalý ýaqyty 19.00-de. Buǵan qosa, elordalyq teatr 26 naýryz 15.00-de Muqaǵalı Maqataevtyń shyǵarmalaryna negizdelgen – «Jyrlaıdy júrek» atty mýzykalyq-poetıkalyq spektaklin kórsetedi. Jastyq lebimen baýraıtyn, eýropany dúr silkindirgen teatr sheteldik talǵampaz kórermenniń qoshemetine bólengen. Sondyqtan da, Almaty qala turǵyndary men qonaqtaryna tuymdy oı men rýhanı lázzat syılaıdy degen senimdemiz.
Kezdesý sońynda stýdentterdiń arnaıy suranysymen Abaıdyń «Jelsiz túnde jaryq aı» ánin akterler hormen tamyljyta shyrqap, jaqsy áserge bóledi. Qorytyndy sózdi «Oner.kz» portalynyń bas redaktory, is-sharany uıymdastyrýshy klýb jetekshisi, belgili dramatýrg Á.Baǵdat barlyq qatysýshylarǵa alǵys aıtyp, ystyq yqylasyn bildirdi.
