Oner Portal jáne «Kózimniń qarasy» mádenı-tanymdyq klýbynyń qoldaýymen uıymdastyrylyp otyrǵan sharaǵa belgili tilshi-ǵalym, represssııaǵa ushyraǵan qazaq zııalylar murasyn zertteıtin «Arys» qorynyń prezıdenti Ánes Ǵarıfolla; synshy, ádebıettanýshy Álııa Bópejanova; fılologııa ǵylymdarynyń kandıdaty Maqpal Arǵynbaeva; aqyn, mádenıettanýshy Qaırat Jańabaev; aýdarmashy Aınash Sadyqova qatarly zertteýshi-ǵalymdarmen qosa oqytýshylar jáne stýdentter qaýymy qatysty.
Kezdesý «Qazaqstan Mańǵystaý» telearnasy túsirgen S.Qondybaı týraly derekti fılmmen bastaldy. S.Qondybaı muralaryn kópshilikke nasıhattaý jáne ol negizin qalaǵan qazaq mıfologııa ǵylymy salasyndaǵy qundy máselelerdi talqylaý arqyly ásirese jastarǵa taǵylym berý maqsatyna ótkizilip otyrǵan shara ǵalymnyń týǵan kúnine oraı josparlanǵan. Bul týraly keshtiń betashar sózinde atalǵan sharany uıymdastyrýshy, «Kózimniń qarasy» klýbynyń jetekshisi Ánnás Baǵdat atap ótti.
Kezdesýdiń moderatory, belgili synshy Á.Bópejanova QONDYBAI álemin zerrteýdiń mańyzyn ataı kelip, bizdiń aldymyzda mıfologııalyq muranyń jekelegen taqyryptaryn saralaý, taldaý arqyly, ulttyq mádenıetti, tildi, ónerdi, jalpy rýhanııatty odan ary qaraı damytýǵa múmkindik beretin jańa aqparat kózderi men tetikterdi tabý mindeti turǵanyna toqtaldy.
Budan ary Ǵ.Ánes, M.Arǵynbaeva, Q.Jańabaev syndy zertteýshi-ǵalymdarymyz Qondybaı álemi týraly, ol bastap ketken zertteý jumystaryn ary qaraı jalǵastyrýdyń mańyzdylyǵyna toqtalyp, tushymdy oılar aıtty. Qysqa ǵana zertteýshilik ǵumyrynda S.Qondybaı til arqyly ejelgi sózderdegi mıftik bolmysty tanyp bilýge bolatyndyǵyn, mıftik máseleni sheshý arqyly kóptegen tarıhı saýaldarǵa jaýap tabylatynyn, zertteýshiler úshin qaı saýaldarǵa mátinniń qaı tustaryna nazar aýdara otyryp mıftik astar izdeý kerektigine baǵyt nusqaıtyn ǵalymnyń ǵylymı bastamalary týraly keńinen áńgime órildi. Zaldaǵy tyńdarmandar da kelgen qonaqtarǵa qyzyqty suraqtar berip, kezdesýge baılanysty óz pikirlerin ortaǵa tastap otyrdy.
Kezdesýdiń qorytyndy sózinde sharanyń uıymdastyrýshysy, Oner Portaly bas redaktory Á.Baǵdat atalǵan portaldaǵy mádenıettaný bóliminde S.Qondybaı eńbekteri nasıhattalyp kele jatqanyna toqtala ketti. Aldaǵy ýaqytta da bundaı sharalardyń uıymdastyrylýynyń mańyzdylyǵyn tilge tıek ete otyryp klýb jetekshisi barsha qatysýshylarǵa jáne klýbtyń ish-sharalaryna qoldaý kórsetken Qazaqstan Respýblıkasy Tuńǵysh Prezıdenti - Elbasy Qoryna alǵys aıtty.
