Kórmege QR Memlekettik Á.Qasteev atyndaǵy óner mýzeıi qorynan, N.Smaǵulovtyń, N.Bısenovtyń jeke jınaqtarynan, Baıtasovtar otbasynyń jeke kollekııasynan alynǵan týyndylar qoıylady.
Shaımardan Tilemisuly Sarıev 1937 jyldyń 22 jeltoqsanynda Gýrev oblysynyń Mahambet aýdanyndaǵy Zabýrýne aýylynda dúnıege kelgen. 1959 jyly ol N.V. Gogol atyndaǵy Almaty kórkemsýret ýchılıesin, 1962 jyly Harkov kórkemsýret ınstıtýtynan bilim aldy. 1967 jyldan KSRO SO múshesi.
Sýretshi shyǵarmashylyǵynyń ulttyq mazmuny tereń ári zaman talabyna saı bolyp keldi. Týyndylarynan Eýropanyń qondyrǵyly keskindemesi men Shyǵys óneri dástúri jetistikteriniń basyn qosyp, ónerinen tulǵalylyqqa, jalpylyqqa degen qulshynys sezilip turdy.
Sh.Sarıev óziniń shyǵarmashylyq jolyn keskindemelik izdenis joldary batys jáne shyǵys dástúrlerin biriktirýge baǵyttalǵan S.Aıtbaev, A.Sydyhanov, T.Toǵysbaev, O.Nurjumaev, M.Qısametdınov, B.Tabıev, T.Dosmaǵambetov syndy sýretshiler tobymen bastaǵan. Olar ulttyq, dástúrli ónerdiń dekoratıvti júıesine jáne post-ımpressonısterdiń kórkemsýrettik júıesine súıenip, janrlyq kórinisterdi qoldandy. Sol jyldary halyq taǵdyry aldynda jaýapty ári daryndylardyń júrekteri men shyǵarmashyqtarynda ulttyq ózin-ózi taný ıdeıalary beleń alyp turatyn. Osy úrdiste Shaımardan Sarıevtiń shyǵarmashylyǵy eleýli ról atqardy.
Sýretshi shyǵarmashylyǵynda portret erekshe oryn alǵan. «Turar», «Balam Lebizdiń portreti», «Ónertanýshynyń portreti», «Bolat» óziniń tanystary men áıeli, balasy syndy jaqyn týystaryna arnalǵan. «Jibek», «Qyzdar» atty týyndylary ashyq ta qalyń tústerdiń yqpalymen, kompozıııalyq qurylymdarynyń yrǵaqtylyǵymen jáne etnografııalyq minezdegi tolyqtyrylǵan bólshektermen dekoratıvti áseri kúsheıtile túsedi. «Shopan», «Balyqshylar» atty jumystarynyń mazmunynda jalpylaýǵa jáne dereksizdikke, epıkalyq úndestiktiń qattyraq shyǵýyna degen talpynys baıqalady. Joǵaryda atalǵan qoldanystardyń barlyǵy qazaqstan
beıneleý ónerine tán boldy.
Shaımardan Sarıevtiń kórmesinde sondaı-aq birneshe sýretter toptamasy qoıylǵan. Sýretshini halyq sahnasy, folklorlyq obrazdar, janrlyq sıýjetter qyzyqtyrady. «Asan qaıǵy», «Orman», «Kesh» t.b. sýretterinde músindi-plastıkalyq bastaý men pishin keńistiginen qashalǵan syzyqtar kórinedi.
Sandýǵash Myrzabekova – "Qazaqstan beıneleý óneri" ortalyǵy, grafıka sektorynyń jetekshisi
