Алмас Нұрғожаев бұл жолғы жеке көрмесін «Өткел» деп атауды жөн санаған. Алғашқы қадамы 2019 жылы өткен «Дебютпен» басталып еді. «Дебют» көрмесі суретшінің дарыны мен табандылығын, өзіндік ерекше қолтаңбасын көрсетті. Алмас Нұрғожаев қазақстандық талантты суретші, педагог Жұмақын Қайрамбаевтан дәріс алған. Шәкіртінің бойына сенім мен күш ұялатқан ұстазының көп жылдық еңбегі ақталды, Алмас өзіне ғана тән стиль қалыптастырды. Бүгінгі күні Алмастың шығармашылық болмысынан үлкен картиналардың монументалды үлгісі, еркін суреткерліктің толғанысы, әдейі деформацияланған масштабтары бар фигуралардың күтпеген динамикалық бұрыштары, үнем, түстердің қайталанбас бояуын көруге болады. Осы сапаның барлығы оның алғашқы жеке көрмесінде-ақ байқалды. Суретшінің кейінгі екі жылдағы күтпеген даму қарқыны көрменің мазмұнын-мәнін арттыра түскен. Оның қолтаңбасы белгілі, бірақ осы көрмеде сол қолтаңбаның түрленгенін көреміз. Кескіндемелердің үлкен форматы композицияны дамытып, күрделендіруге, ойдың қозғалысын көрсетуге мүмкіндік беретін триптихтермен алмасқан.
Экспозиция сюжеттері абстракция мен бейненің шегінде тұрған жеті көлемді триптихтен құралған. Олардың бесеуінде түпсана ойынына ұқсайтын сұйық және өткір формалар комбинациясы, әсіресе қорқынышты түстер мен қиялды еске түсіретін тұрақсыз бейнелер басым. Адамның бейнесі бұл жерде тек көрінер-көрінбес бейнеленген. Ілгектері бар саусақтар және қозғалатын тізе-шынтағы бар антропоморф көріністер, сұр-сары түсті пішінді мазасыз құбыжық бейнелері мен пішіндері үрей туғызады. Суреттер өткір, сергек әрі мәнерлі болып көрінеді.
Көрмеге бірыңғай көркемсурет жобасы ретінде қарайтын болсақ, барлық жұмыстың байланысы мен мазмұны үйлесім тапқанын көреміз. Қиял әлеміне енетін бес триптихтің қос қапталында ерекше туындылар орналасқан. Іші бос текше тәрізді лабиринттер панелді тұрғын үйлерді немесе Малевичтің қиялдарын еске түсіреді. Сол жақтағы бірінші триптих – бұл бір күннің аяқталып, қара-ақ-сұр түсті бұлыңғыр басқа әлемге енуді көрсетеді. Одан кейін екі жыл бойы пандемия жағдайында өмір сүрген автордың өзінің және ортасының басынан кешкен үрей мен драмаға толы сезімдері күшейіп, кейде әлсірегені бейнеленген. Ал оң жақтағы триптихтерде әлем қайтадан өз қалпына келіп, «ғажайып әрі қаһарлы әлем» қызыл-сары-ақ түске енеді.
Суретші қиындыққа қарамастан, түпсанадағы көріністерді бейнелеу, «қас-қағым сәттерді тоқтату» сияқты шеберлікті өзіне міндет етіп қойған сияқты. Ол метафизикалық және философиялық проблемаларға мән берген. Бұл жерде болып жатқан оқиғадан гөрі адамның қайғысы, өмірдің жұмбағы, айналадағы құбыластардың беймәлім болуы туралы рухани мәнге ие мазмұн байқалады. Адамның ішкі күйінің тұрақсыздығы мен құбылмалылығы туындының «Өткел» деген атауға сұранып тұрғанын көрсетеді. Бұл - кеңістіктегі топографиялық қозғалыс қана емес, сонымен қатар үміттенуге құқық беретін белгісіздік шекарасы. Суретші шеберлігіндегі алып-ұшқан құштарлыққа, сезімнің күшіне, бейнелеу қарқынына, еркіндікке қарап, өз ісіне берілген мұндай мықты тұлға біздің өнер кеңістігінде көптен бері болмаған десек артық емес.
Көрме жетекшісі - Екатерина Резникова, ҚР Еңбек сіңірген қайраткері, өнертану кандидаты.
Көрме Игілік Құлбаевты еске алуға арналады және 1 айға созылады.
Өмірбаяны:
Алмас Нұрғожаев 1988 жылы Алматы облысы, Райымбек ауданы, Кеген ауылында дүниеге келген. 2007 жылы О.Таңсықбаев атындағы Алматы сәндік-қолданбалы өнер колледжін бітірген. 2012 жылы Т.Жүргенов атындағы Қазақ ұлттық өнер академиясын (Ж. Қайрамбаев, Ұ. Жұбаниязов шеберханасы) тәмәмдаған. 2017 жылы осы академиядан «Станокты кескіндеме» мамандығы бойынша магистратураны бітірді. 2016 жылдан бері О.Таңсықбаев атындағы Алматы сәндік-қолданбалы өнер колледжінде сабақ береді.
