Memlekettik óner mýzeıinde Qytaı, Úndistan, Japonııa, Koreıa jáne osy aımaqtaǵy basqa da memleketterdiń kórkem ónerin pash etetin 2 myńǵa taıaý eksponat bar. Shyǵys mádenıetiniń týyndylaryn 1935 jyldan bastalǵan jınaqtaý jumysy áli kúnge deıin jalǵasyp keledi.
Qytaı – farfordyń otany. Ol ónerdiń osynaý bir ǵajap túrin óndirý jóninde álemde aldyńǵy qatardaǵy orynda, solaı bolýy zańdy da. Qoldanylatyn tehnologııasy jetildirilgen san alýan túrin qytaı sheberleri búgingi kúni de qupııa etip ustaıdy. Mýzeı qorynda qytaı kózeshi-qumyrashylarynyń ǵana emes, úndi jáne japon sheberleriniń de qoldarynan shyqqan jádigerlik buıymdar bar. Farfor buıymdardyń kópshiligi ózinen keıingi tórt ǵasyrǵa tán. Olar joǵary kásibılik pen osy tabıǵı materıalǵa degen sergek qarym-qatynasty aıǵaqtaıtyn qurastyrmaly formalar men sándik motıvterdiń san alýandyǵyn kórsetedi.
Shyǵys sheberleriniń qolynan shyqqan qola buıymdar ejelden-aq erekshe sheber jasalýymen, daıyndaý tehnologııasynyń joǵarylyǵymen jáne asa kórkemdigimen álemge dańqy jaıyldy. Ǵuryptyq buıymdarda, mysaly, Shıva men onyń pil basty balasy Ganeshke arnalǵan úı ǵıbadathanasynda qola sheberi sheshiminiń yqshamdylyǵyn, detaldarynyń alýandyǵynyń úılesimdi shamalastyǵyn, pildiń aýyr qadamy men buǵynyń jeńil de ásem júgirisin qarama-qarsy salystyra otyryp, ábden oılastyrǵany kórinip tur.
Emalmen qaptalǵan lak buıymdary, aǵash pen pil súıeginen, jartylaı asyl tastardan jasalǵan zattar, toqyma jáne kesteli buıymdar, osy bir tańǵajaıyp aımaqtaǵy halyqtardyń úıdi sándep bezendiretin ári turmystyq-salttyq buıymdary bar. Olar búginde bizdi óner qupııasymen bettestire otyryp, onyń qajettiligin ańǵartady. Shyǵys halyqtarynyń joǵary mádenıeti men rýhanı áleýetin kórsetetin belgisiz sheberlerdiń qoldanǵan tásilderi men jarqyn biliktilikteri tańǵaldyrady.
Ekspozıııanyń kýratory - Marııa Kapelıovıch, «Shyǵys óneri» sektorynyń jetekshisi. Shetel óneri ortalyǵy.
