Bıylǵy jyl ekinshi ret ótkizilip otyrǵan teatr óneriniń dodasy qarasha aıynyń birinshi juldyzynda S.Qojamqulov atyndaǵy Qazaq mýzykalyq drama teatrynda bastaý aldy. Ótken jyly «aımaqtyq» dárejede bolsa, bıyl Halyqaralyq deńgeıge kóterilgen festıvaldiń uıymdastyrý aıasy da, qatysýshy teatrlar daıyndyǵy da joǵarǵy deńgeıde ekeni ańǵarylady. Festıvalge elimizden Respýblıkalyq Nemis drama teatry (Almaty), I.Omarov atyndaǵy oblystyq drama teatry (Qostanaı), S.Qojamqulov atyndaǵy Qazaq mýzykalyq drama teatry (Jezqazǵan), «Jastar» teatrymen (Astana) birge Franııa, Serbııa, Qytaı memleketteriniń de teatrlary qatysýǵa óz ótinishterin bildirdi. ulttyq ónerimizdiń aıasyn keńeıtip ǵana qoımaı, álemdik teatr óneri tájirbıelerinen de ózimizge qajet tustaryn alamyz degen senimimiz mol. Ádil-qazylar alqasy da joǵarǵy deńgeıde tańdalynyp alynǵan. Qazylar alqasynyń tóraǵasy – rejısser, Astana Jastar teatrynyń kórkemdik jetekshisi - N.Jaqypbaı, sonymen qatar S.Qojamqulov atyndaǵy Qazaq mýzykalyq drama teatrynyń akteri, QR halyq ártisi - Dosjan Janbotaev, Serb jazýshylar qaýymdastyǵynyń Vıe-prezıdenti, synshy - Snejana Kýtrıkı, T.Júrgenov atyndaǵy QazUÓA doenti, ónertaný kandıdaty - Merýert Jaqsylyqova, G.Kamal atyndaǵy Tatar memlekettik Akademııalyq teatrynyń ádebıet bóliminiń meńgerýshisi, teatr synshysy - Nııaz Iglamov syndy mamandar qoıylymdarǵa óz baǵasyn beretin bolady.
Festıvaldiń alǵashqy kúni kózi qyraǵy kórermenge eki teatr óz jumystaryn kórsetip úlgerdi. Qoıylymdar sońynan kásibı mamandar men teatr ujymdary talqylaý ótkizip, artyqshylyqtar men kemshin tustar sarapqa salyndy.
Alǵashqy bolyp festıval shymyldyǵyn ashqan S.Qojamqulov atyndaǵy Qazaq mýzykalyq drama teatrynyń «Qara oramal» poetıkalyq dramasy. Aqyn Ǵ.Jaılybaıdyń ótken ǵasyrdyń azapty kezeńin sýrettegen týyndysyn rejısser T.Janbotaev sahnalady. Avtor qasiretti shejireni, bir ǵana halyqtyń taǵdyryn emes jalpy adamzattyń, ana beınesiniń, óner adamy bolmysynyń jáne adam tózgisiz qatygezdiktiń ákelgen zardabyn poetıkalyq tilmen kórkem jetkize bilgen. Rejısser avtordyń usynǵan barlyq jaǵdaıdy qarastyra otyryp birtutas dúnıe jasaǵan. Týyndynyń tamyry tereńde jatyr. Qandy jyldar qasiretin berýde ár beıneni óz erekshelikterimen kórsetýge tyrysqanymen lagerdegi tutqyndardyń syrk kelbetinde, sóıleý mánerinde uqsastyqtar kóp boldy. Tarıhqa úńilsek lagerge qarapaıym adamdardy emes, rýhy myqty, aqyly kemel, halyqtyń biregeı qaımaqtary men olardyń jarlaryn attandyrǵan. Demek, keıipkerlerde sondaı bir bıiktik, bolmashyǵa tozyp ketetin borkemik emes, rýhanı myqtylyq ańǵarylýy tıis edi. Árbir akter replıkalaryn sezinip, shynaıy jetkizýge tyrysqanymen, shekten tys daýysqa salý men emoııany kórsetýge mán bergen. Rolge birjaqty minezdeme berý spektakldiń temporıtmin tómendetip qana qoımaı, akterdiń ekinshi planyn kórýge kedergi keltiredi. Rejısserdiń sońǵy sahnalardyń birindegi analarǵa áldıdi óz tilinde aıtqyzýy utymdy sheshim dep esepteımiz. Analar beınesin, olardyń ishki hál-kúıin, nárestelerdiń ólimin, ózderi áldılep kele jatqan jórgekterinen qum bolyp tógilýin rejısser sátti sahnalaı bilgen. Poetıkalyq drama janrynda sahnalaǵan qoıylym qaı kezeńde de qundylyǵyn joǵaltpaq emes.
Dál osy kúni Respýblıkalyq Nemis drama teatrynyń A.Chehovtyń «Apaly-sińili úsheý» (rej. Natasha Dýbs) psıhologııalyq dramasyna kýá boldyq. Festıval aıasynda taǵy bes teatrdyń týyndylaryn tamashalap, jezqazǵandyqtarǵa rýhanı kókjıekterin keńeıter taǵylymdy dúnıeler usynylady degen senimdemiz.
