Halyqaralyq teatr kúni men Ǵ.Músirepovtiń 115 jyldyǵyna arnalǵan "ALTYN SAQA" atty jańa qoıylymdar festıvali uıymdastyrylyp otyr. Teatr repertýaryndaǵy 2016 jyldyń naýryzy men 2017 jyldyń naýryzy aralyǵynda sahnalanǵan balalar qoıylymdary jáne keshki qoıylymdar saıysqa túsetin bolady. Festıvalge 9 qoıylym qatysady:
Festıval júldeleri:
1. "Jyl aktery"
2. "Úzdik er kisi beınesi"
3. "Úzdik áıel beınesi"
4. "Ekinshi qatardaǵy úzdik er kisi beınesi"
5. "Ekinshi qatardaǵy úzdik áıel beınesi"
6. "Epızodtyq roldegi úzdik er kisi beınesi"
7. "Epızodtyq roldegi úzdik áıel beınesi"
8. "Kórermen kózaıymy"
9. "Teatr úmiti"
Festıvaldiń qazylar alqasy:
Erkin Jýasbek - Ónertaný ǵylymdarynyń kandıdaty
Esmuhan Obaev - Qazaqstannyń halyq artısi, professor
Satybaldy Narymbetov - Qazaqstannyń eńbek sińirgen qaıratkeri, Qazaq KSR-niń Memlekettik syılyǵynyń laýreaty
Sáýle Ábedınova - Ónertaný ǵylymdarynyń magıstri 24 naýryz kúni, saǵat 18.30-da festıval nátıjeleri jarııalanyp, konerttik baǵdarlama usynylady.
Festıvalge qatysatyn qoılymdarǵa toqtalyp óter bolsaq:
1. E.Amanshaev “Ol” (E.Amanshaevtyń "Úzilgen besik jyry" psıhologııalyq dramasy jelisi boıynsha)
Qoıylymnyń kórkemdik-ıdeıalyq maqsaty – qazirgi áleýmettik qoǵamǵa saı sanaly urpaq, salıqaly tulǵa qalyptastyrý. Bul spektakldiń kórermenge rýhanı azyq berýde mańyzy orasan.
Rejısser Erlan Káribaevtyń traktovkasy boıynsha jeke adamnyń taǵdyry arqyly búgingi ómirdegi áleýmettik qaıshylyqty kórsetedi. Basty roldegi akter Danııar Bazarqulov – Ol keıipkeriniń ómirden óz ornyn izdegen fılosofııalyq tolǵanysyn, shynaıy shyndyqtyń qupııasyn jan-jaqty qarastyrýǵa umtylǵan ishteı tartysy kimdi bolmasyn oılandyrary anyq.
Aqparat pen tehnıka quraldarynyń damyǵan zamanynda adam janynyń qunsyzdanýy qazirgi kezde basty máselege aınalyp otyr. Osyndaı kúrdeli dúnıelerdiń sheshimin izdeýge shaqyratyn monospektakldi kórýge asyǵyńyzdar.
2. M.Áýezov “Telǵara” ("Jas Abaı" tragedııa)
Sahnalyq nusqa: J.Hadjıev
"Abaı álemi –bizdi jeti túnde adastyrmas Temirqazyq ispetti.
Soǵan qarap tirligimizdiń durys-burysyn saraptaı alamyz."
(N.Á.Nazarbaev, Qazaqstan Respýblıkasynyń Prezıdenti)
Jasymda albyrt óstim, oıdan jyraq
Aılaǵa, ashýǵa da jaqtym shyraq.
Erte oıandym, oılandym, jete almadym,
Etekbasty kóp kórdim elden biraq. (Abaı.)
"Men bir jumbaq adammyn, ony da oıla!" - degen Abaı álemin biz jete túsinip, Abaı ǵıbratyna tolyq qanyǵa aldyq pa?..
Azǵyndyqqa qoıylar tosqaýyldar bolady. Tobyrlyq sanany silkintetin ne?.. Surqııa menen sur jylandarǵa tas atar kezder de bolady. Mine, osyndaı tirshilik tutqıyldaryn uǵynǵan bala Abaı birden eseıip ketedi. Eseıtken kimder?- Óz ortasy..
Abaı – taýsylmaıtyn álem! Endeshe, kórermen!
"Jas Abaıdy" kórip, elge de bir esti keregin sezingendeı bolasyz...
3. M.Ahmanov “Aı men kún”
Amerıkandyq órshil senator ǵumyr boıy ózimen hat alysqan áıeldiń qazasynan keıin ótken ómirin bir sát eske alady.
Eki júrek, shólirkegen keıip... Qunarsyz kúlki men tamshy
kóz jasy. Hattar, hattar...
Bir-birin izdeý, saǵyný, ańsaý, kútý, kúıý men janý... Álemniń ár túkpirinde óz ómirlerin súrip jatsa da, alǵashqy Mahabbatty umytpaý.
5. Jańa jyldyq oqıǵa
6. “...Bir sen úshin týdym!” Ý.Shekspır "Romeo – Djýletta" tragedııasynyń jelisi boıynsha
Máńgi mahabbat bar jerde, máńgi mashaqat bar. Rııasyz ǵashyqtardyń aınalasyndaǵy ázázilder men azǵyrýshy top qaı zamanda da qaıǵy-qasirettiń qandy shekpenin jamylyp júrgen. Áýlet pen áýlet, top pen top, tobyr men tobyrdyń kesirinen qanshama mahabbat qurban boldy. Bul – yqylym zamannan beri kele jatqan ultqa bólinbeıtin adamzattyq ahýal. Bul – tipti, bizdiń de, sizdiń de, olardyń basynda bolǵan jáne bola da beretin máńgilik másele!..
Shekspırdiń "Romeo – Djýlettasy" da – solardyń kebi...
7. J.Áliken “Sıqyrly tereze” (ertegi)
Balalardyń oı-qııalyn ulttyq rýhta, órlikke, batyrlyqqa, adaldyqqa, tazalyqqa jeteleıtin shym-shytyryq oqıǵa "Sıqyrly terezeniń" syrynda jatyr. Sıqyrly tereze kishkentaı kórermenderdiń úlken ómirge úmitin oıatyp, birte-birte armanyna aınalady. Ertegi elinen keletin eles emes, tarıh sahnasynan kelip, búgingi ómirdiń san túrli mashaqatyn jeńip, batyrsymaqtarymen beldesip jeńiske jetetin keıipker balalardyń qýanyshyn oıatpaı qoımaıdy. Zamanaýı ómirdegi bar qıynshylyqtardy basynan ótkerip, jeńe biletin baıaǵy batyrlarymyz búgingi ýaqytqa tap kelse, qalaı bolar edi?
8. Baıanǵalı Álimjanov “Sýper jeńgetaı Serkesh” ( komedııa )
Zamannyń sıqy osy ma?.. Adamılyqtyń quny qaısy?.. Baılyqtyń býy, aqshanyń taby kisini isindirmeı qoıýy múmkin be?.. Jyltyraqqa áýestik, jaǵympazdyqpen satylý, eńbeksiz tegin mal tappaq áýselemizdi kóterip, kósegemizdi kógertpek pe?..
Mine, osy zamanǵy túıtkildi suraqtardyń tórkini osyndaı bolyp keledi. Biraq, biz báribir, túptiń-túbinde adamılyq qundylyqtyń saqtalǵanyn qalaımyz. Sońǵylyǵynda, solaı bolady da...
9. Oljas Janaıdarov “Jastyq týraly...” (allegorııa)
Ómirdi óz qalaýymsha súrsem bola ma? Álde "kóppen kórgen uly toı" dep, ortanyń súre jolynan aýytqymaý durys pa? Jaratylystyń jazǵanyna kóndigip, buıyrtqanǵa toba degim kelmese she? Armanyma umtylyp, saǵynǵanymdy izdep, tanyǵym kelgenge talpynsam, adasam ba?
Kórneki fotolar Ǵ.Músirepov atyndaǵy teatr qorynan alyndy.
