"Máńgilik eldiń altyn adamy" teatr festıvali ótedi

Atyraý qalasynda 21-24 mamyr arlyǵynda «Máńgilik eldiń altyn adamy» atty Respýblıkalyq teatr festıvali ótedi.
"Máńgilik eldiń altyn adamy" teatr festıvali ótedi

Atyraý qalasynda 21-24 mamyr arlyǵynda EKSPO-2017 halyqaralyq kórmesi aıasynda, Atyraý oblysy ákimdiginiń qoldaýymen, Atyraý oblystyq Mahambet atyndaǵy Qazaq drama teatrynda Memlekettik syılyqtyń laýreaty, halyqaralyq «Alash» jáne táýelsiz «Platındi Tarlan» syılyǵynyń ıegeri, aqyn-dramatýrg Iran-Ǵaıyptyń 70 jas mereıtoıyna oraı «Máńgilik eldiń altyn adamy» atty Respýblıkalyq teatr festıvali ótedi.

Festıval kúnderi Qazaqstannyń ár qalalarynan kelgen teatrlar óner kórsetedi.
21-mamyr Iran-Ǵaıyptyń «Súıinbaı» dramalyq eposynyń tusaýkeserimen sahna shymyldyǵyn 80 jyldyq tarıhy bar jergilikti Atyraý teatry bastap ashyp, barlyǵy alty teatr óner kórsetedi dep kútilýde. «Súıinbaı» qoıylymy mamyrdyń 4-i kúni, Atyraý oblysy ákiminiń, oblystyń mádenıet mekemeleri basshylarynyń jáne shyǵarma avtory Iran-Ǵaıyptyń tikeleı qatysýymen teatrdyń kórkemdik keńesine tapsyryldy. Qoıylymdy qoıýǵa Almaty qalasynan arnaıy tájirıbeli rejısser Murat Ahmanov shaqyryldy.
22-mamyr:
  • 11.00-de B.Rımova atyndaǵy Almaty oblystyq drama teatry (Taldyqorǵan qalasy) «Negizgi sharýa» spektaklin usynady. Rejısseri – Bazarbek Toqymtaev.
  • 19.00-de Ǵ.Músirepov atyndaǵy balalar men jasóspirimder teatry (Almaty qalasy) «Estaıdyń qorlany» qoıylymyn kórermenge usynady. Rejısseri – Murat Ahmanov.
23-mamyr:
  • 11.00-de Abaı atyndaǵy memlekettik akademııalyq drama teatry (Semeı qalasy) «Adasqan baq qusy» qoıylymyn kórsetedi. Rejısseri – Ersaıyn Tóleýbaı.
  • 19.00-de M.Áýezov atyndaǵy Qazaq memlekettik akademııalyq drama teatry (Almaty qalasy) «Qorqyttyń kóri» spektaklin usynady. Rejısseri – Ionas Vaıtkýs.
24-mamyr:
  • 11.00-de Batys Qazaqstan oblystyq Hadısha Bókeeva atyndaǵy Qazaq drama teatry (Oral qalasy) «Máńgilik eldiń altyn adamy» qoıylymymen festıvaldiń negizgi bólimin aıaqtaıdy. Rejısseri – Murat Ahmanov.

 

Festıvaldiń sońǵy kúni, saǵat 17.00-de «Atyraýym – abyz-alybym» atty aqynnyń shyǵarmashylyq jyr keshi ótedi.