Gúlzııa Sádýaqasova
T.Júrgenov atyndaǵy QazUÓA, teatrtaný, IV kýrs
Almaty qalasynda 1-13 aqpan kúnderi ótetin «Otkrovenıe» Halyqaralyq oryndaýshylyq óner festıvali ashyq dep jarııalandy. Teatr prodıýseri Olga Sýltanovanyń uıymdastyrýymen bıyl tórtinshi ret kórermenge jol tartqan bul festıvalde Máskeý, Sankt-Peterbýrg qalalarynyń jáne Armenııa men Latvııadan kelgen teatrlar óner kórsetedi. Qazaqstandyq shoýkeıs negizinde mynadaı spektaklderdi kórýge bolady: M.Áýezov atyndaǵy Qazaq Memlekettik akademııalyq drama teatry «Lır patsha», «Artıshok» teatry «Uıat», Nemis akademııalyq drama teatry «Revızor», «Jas sahna» teatry «Lavına», «Dom Q» teatr-stýdııasy «Prıchıny jıt», sýretshi Darıa Spıvakovanyń avtorlyq jobasy «Psıhoz 4.48», teatr synshysy Olga Malyshevanyń avtorlyq jobasy «Komıýnıtı», táýelsiz «Býnker» teatry «Stay true». Al, kórshiles memleketterden kelgen teatrlardyń qoıylymdary 6 aqpannan bastap usynylady.
Sondaı-aq, festıval aıasynda sheteldik qonaqtar lekııalar men semınarlar júrgizip, sheberlik dáristerin kórsetetin bolady.
Festıval shymyldyǵyn «Dom Q» teatr-stýdııasynda rejısser Vıktor Nemchenko sahnalaǵan «Prıchıny jıt» spektakli ashty. Marına vetaeva, Zınaıda Raıh, Gala Dalı, Lılııa Brık syndy áıgili áıelderdiń ómirinen alynǵan sıýjetterge qurylǵan dramanyń senarıin shyǵarmashylyq top birigip jazǵan. Oqıǵa as bólmesinde ótedi. Ár keıipker basynan keshken oqıǵasyn, kúıinish-súıinishin, ózine tán shyndyǵyn bir bólmede júrip-aq, jaıyp salady. Spektakldiń basynan aıaǵyna deıin aktrısalar kameraǵa qarap sóılep, munyń bári estelik úshin ekenin aıta ketedi. Rejısser bul arqyly ózderi ólgenimen, esimderiniń óshpeıtinin jetkize kelip, árkimniń ózi qalaǵanyndaı ómir súrýge quqyǵy bar ekenin, qatelikteri úshin ózi ǵana jaýap beretinin basa aıtqan. Áýelide pesa emes, senarıı retinde jazylǵanyna qaramastan, Vıktor Nemchenko oqıǵalardyń bir-birine baılanysyn qadaǵalap, júıeli órbýine yqpal jasaǵan.
