22 қараша күні, Т.Жүргенов
атындағы Қазақ Ұлттық өнер академиясының кинозалында, Қазақ анимациясының 50
жылдығына байланысты анимацияның аға-буын өкілдері «Көзімнің қарасы»
мәдени-танымдық клубында бас қосты.
Белгілі аниматорлар,
суретшілер, анимация режиссерлері мен сценарист Маргарита Соловьева кездесуге
келген қонақтарға анимация шығармашылық процесінің сырымен бөлісті.
Кездесуді "Қазақфильм" АҚ, анимация бөлімінің редакторы Салтанат Еркін
жүргізді.
Ең алғаш сөз кезегін алған Любовь Радионова анимацияның жасалу жолдары
туралы арнайы суреттер мен қуыршақтарын алып келіп әңгімелеп берді.
Советтік кезеңде туған қазақ
анимациясының атасы болған Әмен Қайдаров «Қарлығаштың құйрығы неге айыр?»
мультфильмін жасау үшін Сұлтан Қожықовтың «Қыз Жібек» фильмінің бюджетінен
артылған ақшаны іске асырған екен. Бұндай деректерді анимация режиссері Жәкен
Дәненов майын тамызып баяндап берді.
Маргарита Соловьева өзінің
анимация сценарийсті болып қалыптасу жолындағы қызықты жайттарды әңгімеледі.
Анимациямен есімі қатар
естілетін сурет өнерінің белді өкілі Ирк Молдабеков те өз ісінің қызығы мен
қиыншылығын тілге тиек етті.
Қоюшы-суретші Малик
Мұхаметкаримов пен режиссер Рамиль Усматовтар жұмыс істеу тәртібінің кеңес кезеңі мен
тәуелсіздік уақытындағы айырмашылығын кеңінен түсіндірді. Анимацияға деген
көрермендер мен билік өкілдерінің қатынасы туралы да сөз етті.
Анимацияның жас буын
өкілдерінің атынан сөз алған Адай Әбілда жақында жарыққа шығатын толықметражды «Күлтегін»
анимациялық фильмінің трейлерін көрсетіп қуантты. Кездесуге келген аниматор мамандығында
оқитын студенттерін өзінің жұмыс орнына тәжірбие алуға шақырды.
Іштегі шерлерлерін тарқатып,
сағынысып қалған анимация өкілдері мен көкейінде жүрген сұрақтарына жауап алған кездесу қонақтары топтық суретке
түсіп тарады.
