«Kózimniń qarasy» klýbynyń uıymdastyrýymen rejısser Mádı Baljanovtyń «Pıkapty izdeýmen» qysqametrli fılminiń kórsetilimi boldy. Kórsetilimge fılmniń rejısseri, senarısti, montajyn jasaǵan jáne operatory Mádı Baljanov pen basty róldi somdaǵan Danııar Kıbaev keldi.
Fılmde avtomehanık bolyp jumys isteıtin Raqym, nashaqor bastyǵymen birge qosalqy bólshegin paıdalaný úshin eski pıkap avtokóligin izdeıdi. Biraq, ekeýi de kóliktiń qandaı bolatynyn bilmeıdi. Pıkapty izdeı júrip Raqymnyń úsh dóńgelekti belesebet týraly oryndalmaǵan balalyq armany oıanady, osynyń áserinen júıke júıesinde olqylyq paıda bolyp, qozǵalys úshin dóńgelekti eshqashan paıdalanbaýdy sheship tek qana júgire bastaıdy. Adal nıetti bastyǵy qytaılyq qurastyrýshylar jasaǵan úsh dóńgelekti belesebet jiberedi. Endi Raqymdy aýyr tańdaýlar kútip tur: balalyq armanyn qabyldaý, ári qaraı ózin izdeý jolynda júgire berý. Nemese pıkaptyń jolynda... Raqym fılmde óz tańdaýyn jasaıdy. Kórsetilimnen soń fılmniń jasýashy quram men stýdentter erkin pikir-almasý jasady.
Jalpy, Mádı Baljanov pen Danııar Kıbaevty kınotanýshy nemese óner akademııasynyń basqa da mamandyqtarynda oqıtyn stýdentter tanymaıtynyn jasyrmady. Ekeýi de kıno ónerine basqa saladan kelgen jandar.
Mádı Baljanov arhıtektýra mamandyǵynda oqyp júrip óz álemi emes ekenin sezgen. «Arhıtektýra qozǵalmaıtyn óner túri, men úshin ol jetkiliksiz boldy. Meniń álemim mýzykada nemese kınoda ekenin bildim de oqýdy tastap kınony tańdadym. Jetpis myńǵa fotoapparat satyp alyp úıge kelip eki saǵattyń ishinde alǵashqy qysqametrli fılmimdi túsirdim. Báribir mende bilim joq ekenin sezdim. Sosyn ǵalamtor jelisinde rejısser Emır Baıǵazınge hat jazdym. Hatty jazbas buryn Emırdiń álemge degen kózqarasyn túsiný úshin onyń búkil suqbattaryn oqyp shyqtym. Jarty bet hatty bir kún boıy jazdym. Emırge ózime ustaz kerek ekenin aıttym. Emır usynysymdy qabyldap, óziniń túsirilimine tegin jumysqa qabyldady. Men kóp nárseni túsindim. Emırge meniń alǵashqy túsirgen fılmim unady» - dedi Mádı aǵynan jaryla. Kıno álemine aıaq basqaly eki jyldyń ishinde jeti qysqa metrli fılm túsiripti. Qázirgi sátte taǵy bir fılminiń túsirilimine daıyndalyp júrgenin aıta ketti. Kıno jasaý úshin eshqandaı eksperımentten qoryqpaýǵa shaqyrdy. Ónerdiń shyńy táýekelde ekenin túsindire ketti.
Danııar Kıbaev akter retinde ózin áli moıyndamaıtynyn aıtty. Narhoz ýnıversıtetin ekonomıst mamandyǵy boıynsha bitirip shyqqan Danııar bul fılmge kezdeısoq shaqyrylǵan. Birneshe serıaldarda epızodtyq rólderde oınaǵan jáne jarnamalyq rolıkterde kóringenimen alǵashqy basty róli eken.
Fılmniń mazmunyndaǵy aıtylǵandar kóriniste múlde bólek kórsetiledi. Pıkap-sulý qyz, Raqym ózine sulý qyz izdep júredi. Óziniń boıyndaǵy qyzǵa sóıleı almaıtyn qasıetin joıýǵa umtylady, joıa almaıdy. Ózimen-ózi ómir súrýi úshin júgire beredi, ol úshin pıkaptyń mańyzy joǵalady. Fılmniń negizgi ıdeıasyn rejısser osylaı túsindirdi. Bul taqyryp óziniń basynan ótken bir kezeńi týraly deıdi. Fılmde bir oqıǵa eki ret qaıtalanady, ekinshi qaıtalanýy kúlkili aýdarmamen jasalǵan. Aýdarmany jazǵan jáne dybystaǵan Aıtýar Qanaıbek.
Mádı bolashaqtaǵy josparlarymen de bólisti. «Debıýt» shyǵarmashylyq birlestiginiń qarjylandyrýymen fılm túsirse, tolyqmetrajdy fılmge aıaq basa berýine bolatynyna senimdi ekenin aıtty. Stenlı Kýbrıktiń shyǵarmashylyǵyn jaqsy kóretinin, onyń fılmderindegi kadrlar adamdy magnıtshe tartady deıdi. Ónerdiń qaınaǵan ortasynda júrgen «Kózimniń qarasy» klýby men akademııa stýdentteri arnaıy bilimi bolmasa da kıno ónerinde ózinshe izdenis jasap júrgen jas rejısser Mádı Baljanov pen akter Danııar Kıbaevqa sáttilik tilep, shyǵarmashylyq baılanystaryn úzbeıtinderine ýáde berisip, toptyq sýretke túsip tarady. 
