T.Júrgenov atyndaǵy Qazaq ulttyq óner akademııasynda «Kózimniń qarasy» mádenı-tanymdyq klýbynyń uıymdastyrýymen M.Áýezov atyndaǵy Ońtústik Qazaqstan memlekettik ýnıversıtetiniń «Pedagogıka jáne mádenıet» fakýlteti «Óner» kafedrasynyń stýdenttik fılmderiniń kórsetilimi boldy. Kórsetilimde Qazybek Ýbaıdınniń «Muzdy ýaqyt», Erik Kedelbaevtyń «Meıirimdi qubyjyq», Marǵulan Erkinniń «Túısik» fılmderi kórsetildi.
Kórsetilim barysynda Shymkenttik jas rejısserlerdiń fılmderinde erekshe kózqarastyń bar ekeni baıqalady. Oqıǵanyń baıandalýy, keıipkerler obrazynda, operatorlyq jumysy men montajdaý tásilderinde tereń izdenisterdiń tolyp jatqany qýantady. Úsh fılmniń de rejısserleri «teatr rejısseri» mamandyǵynda oqıtyn stýdentter.
Qazybek Ýbaıdınniń «Muzdy ýaqyt» fılminde ár túrli jastaǵy keıipkerler bir bólmede otyryp ózderiniń ómirlerinde istegen qatelikterin ókinishpen baıandaıdy. Fılmniń taqyrybynda aıtylyp turǵandaı, qázirgi qoǵam adamdarynyń júrekteriniń muzǵa aınalǵanyn aıtady. Fılm formasy kınoǵa qaraǵanda teatrǵa jaqyn. Keıipkerlerdiń dıalogtarynda teatr qoıylymynyń elementteri anyq kórinedi.
Batystyq fılmderdegi qubyjyqqa aınalyp ketetin keıipkerlerdi Erik Kedelbaev qazaqı ortaǵa sátti ákelgen. «Meıirimdi qubyjyq»
fılminde kishkentaı balanyń qubyjyqqa aınalyp, jaqyn adamdarynyń odan teris aınalýy kórsetilgen. Erik Kedelbaevtyń taqyryp turǵysynan izdenisteri, kórermendi qanshalyqty baýrap alǵany, fılmnen keıingi soǵylǵan shapalaqtan anyq baıqaldy. Fılm sýretten buryn kadr syrtynan baıandaý arqyly jasalǵan. Kórermenderge qozǵalǵan taqyrybynyń tereńdigi turǵysynan unaǵany anyq.
Kórsetilimge «Túısik» fılminiń rejısseri, «teatr rejısseri» mamandyǵynyń II kýrs stýdenti Marǵulan Erkin arnaıy keldi. «Túısik» fılmi anasynan aıyrylǵan jigittiń jyndyhanadaǵy jaı-kúıin baıandaıdy. Fılmdegi tehnıkalyq-vızýaldyq ádister utymdy paıdalanylǵan. Kórsetilimge kelgen qonaqtar Marǵulanǵa týyndaǵan suraqtaryn qoıyp, pikir almasty. Marǵulannyń fılmi «Samǵaý» kınofestıvalinde «mýzykalyq sheshim» nomınaııasyn jeńip alǵan.
Kórsetilimdi kınotanýshy Erjan Jumabekov júrgizdi. Erjan Jumabekov: «oblystardaǵy jas rejısserlerdiń fılmderin nasıhattap, olarmen tyǵyz qarym-qatynas ornatýymyz qajet» - deıdi. T.Júrgenov atyndaǵy óner akademııasynyń «Kıno tarıhy men teorııasy» kafedrasynyń aǵa oqytýshysy, PhD, kınotanýshy Alma Aıdarova kórsetilimge arnaıy kelip, Shymkenttik rejısserlerge izdenisteri úshin alǵysyn bildirip, teatr rejıssýrasynan shyqqan kıno áleminde izi bar rejısserler týraly aıta ketti. Marǵulan Erkinge kıno teorııasyna baılanysty da izdenisterdi jalǵastyrýǵa usynys jasady.
Kórsetilimge qatysqan barsha qonaqtar jas izdenimpaz rejısserlerge sáttilik tilep, arnaıy toptyq sýretke túsip tarasty.
