Búgin, 10-naýryz kúni T.Júrgenov atyndaǵy Qazaq ulttyq óner akademııasynda kınorejısser, jazýshy, QR memlekettik syılyǵynyń laýreaty, Franýz kınoakademııasynyń "J.Sadýl" atyndaǵy syılyǵynyń ıegeri Satybaldy Narymbetovtyń "Kózimniń qarasy" dep atalatyn jańa jınaǵynyń tusaýkeser rásimi ótti. Keshti belgili jazýshy, kınodramatýrg, QR eńbek sińirgen qaıratkeri Symaǵul Elýbaı júrgizdi. Kitaptiń tusaýkeser rásimine kınorejısser Dámir Manabaı, Dárejan Ómirbaev sonymen qatar, "Qazaq ádebıeti" gazetiniń bas redaktory Jumabaı Shashtaıuly, "Almaty aqshamy" gazetiniń bas redaktory Qalı Sársenbaı jáne rejısser-operator Qalıla Omarov qatarly kórnekti óner jáne qoǵam qaıratkerlerimen qosa ustazdar men stýdentter qaýymy qatysty.
"Kózimniń qarasy" mádenı-tanymdyq klýby men Sh.Aımanov atyndaǵy "Qazaqfılm" AQ birlese uıymdastyryp otyrǵan keshke T.Júrgenov atyndaǵy QazUÓA-nyń kitaphana ujymy, "Kıno jáne TV" fakýlteti atsalysty.
Qazaq rýhanııatyna taǵy bir súbeli týyndy, bereri mol shyǵarma kelip qosylýymen quttyqtaǵan moderatordyń betashar sózinen keıin, óz lebizin alǵashqylardyń biri bolyp avtordyń zamandasy, belgili kınorejısser Dámir Manabaı bildirdi. Rejısser óz kezeginde kıno men ádebıette qatar eńbek etip, rýhanııat áleminde óz keńistigin qalyptastyra alǵan Satybaldy Narymbetovtyń jańa týyndysynyń qundylyǵy, urpaqqa berer taǵylymy týraly aıtyp ótti. "Almaty aqshamy" gezetiniń bas redaktory Qalı Sársenbaı avtordyń qazaq kıno óneriniń órkendeýine, ulttyq bolmysymyzdy kıno tili arqyly álemdik deńgeıge kóterýge qosqan eńbekeńbegi men shyǵarmashylyq jolyna toqtalyp, rejısserdan aldaǵy ýaqytta da qýatty shyǵarmalar kútetinin aıtty.
"Kózimniń qarasy" kitaby basylyp shyqqan "Hantáńiri" baspasynyń ujymy da saltanatty keshte avtordyń jańa shyǵarmasyna sát-sapar tileı otyryp, jýyq arada kitaptiń suranysqa oraı qaıtalaı basylym kóretinin jetkizdi. Keshte sonymen qatar jazýshy, S.Narymbetovtyń qalamdas inisi Ótesh Qyrǵyzbaı, T.Júrgenov atyndaǵy QazUÓA, "Teatr óneri" fakýltetiniń dekany Aman Bekenuly qatarly qonaqtar sóz alyp, belgili kúıshi Murat Ábýǵazy men dástúrli ánshi Nurjan Janpeıis óner kórsetip, avtordy jańa kitabymen quttyqtady.
Avtor óz kezeginde "Kózimniń qarasy" kitabynyń basylym kórýine tikeleı qoldaý bildirgen Mádenıet jáne sport mınıstri Arystanbek Muhamedıulyna, kitaptiń jaryq kórgen baspasy – "Hantáńiri" ujymyna jáne tusaýkeserdi uıymdastyrýshylarǵa alǵys bildirdi.
Kesh sońyna qaraı, stýdentter rejısserge kókeılerinde júrgen suraqtaryn qoıyp jatty. Búgingi kıno óneri, ádebıet jáne taǵy basqa da taqyryptar haqynda erkin pikir almasýǵa ulasqan tusaýkeser rásimi rýhanı, taǵylymdy kesh boldy.
"Kózimniń qarasy" kitaby S.Narymbetovtyń avtorlyq álemin tereńirek asha túsetin týyndy. Rejısserlik óner men jazýshylyqtyń úılesim tabý joldary, ómir men óner soqpaǵy baıandalatyn jınaqqa avtorlyq oı-tolǵamdar, esseler, estelikter, suhbattar, senarııler enip otyr. Aıta keteıik, buǵan deıin avtordyń "Tentek", "Assalaýmaǵaleıkým, Atlantıda!" qatarly birneshe kitaby jaryq kórgen bolatyn.
