Rejısserleri Erlan Nurmuhambetov (Qazaqstan) jáne Lıza Takebanyń (Japonııa) «Ýaqyt joldary» fılmi XXIII Halyqaralyq Shanhaı kınofestıvaliniń (SIFF) aıasynda kórsetiledi.
Koronavırýs pandemııasyna baılanysty keıinge shegerilgen Qytaıdyń eń úlken kınobaıkaýy – Halyqaralyq Shanhaı kınofestıvali shildeniń 25-i men tamyzdyń 2-i aralyǵynda ótedi. Bul týraly festıvaldiń resmı saıtynda jarııalanǵan.
Baıqaýdyń uıymdastyrýshylary bıyl festıval onlaın jáne oflaın formatynda ótetinin, sondaı-aq, COVID-19 indetiniń aldyn alý sharalaryn saqtaý qatań baqylaýda bolatynyn habarlady. Is-sharaǵa qatysýshylar úshin kınoteatrlar men ashyq aspan astyndaǵy kıno kórsetilimder, onlaın-kórsetilimder, SIFFFORUM kınematografııalyq forýmy, kreatıvti-ınvestıııalyq kınojobalardyń tusaýkeseri uıymdastyrylady. Al «Belbeý jáne Jol» kıno aptalyǵy sheńberinde Qazaqstan men Japonııa birlesip túsirgen «Ýaqyt joldary» fılmi kórsetiletin bolady.
Aıta ketý kerek, osy baǵdarlama aıasynda «Ýaqyt joldary» fılminen bólek AQSh, Mysyr, Ulybrıtanııa, Grekııa, Úndistan, Vengrııa, Túrkııa, Qytaı, Germanııa jáne basqa da elderden 15 kartına usynylady.
Qala kınotertrlaryndaǵy kórsetilim kestesi SIFF saıtynda jarııalanǵan, al onlaın platformadaǵy bıletterdiń satylymy 20 shildeden bastalady.
Esterińizge salaıyq, «Ýaqyt joldary» fılmin Qazaqstan men Japonııa birlesip túsirgen. Qazaqstan tarapynan QR Mádenıet jáne sport mınıstrliginiń tapsyrysymen Sh.Aımanov atyndaǵy «Qazaqfılm» kınostýdııasy jumys istese, Japonııa tarapynan – «Tokyo New Cinema» kompanııasy qolǵa alǵan.
Fılmde tynysh ómiriniń shyrqyn buzyp, barymtashylar otaǵasyn aıaýsyz óltirgen otbasy týraly baıandalady. Marqumnyń 12 jasar balasy Oljas, barymtashylardyń qolynan mert bolǵan ákesiniń ólimine qaıǵyryp, zulymdyqpen kúresip, otbasylaryna túsken aýyrtpalyqty qaryndastarymen birge keshedi. Qorǵansyz qalǵan Oljastyń otbasyna ǵaıyptan paıda bolǵan bógde bireý qol ushyn sozady.
Fılmde basty rólderdi Kann kınofestıvalinde úzdik aktrısa atanǵan, Altyn palma butaǵynyń ıegeri Samal Eslıamova, tanymal qazaqstandyq akter Dýlyǵa Aqmolda somdaıdy. Oljastyń rólin Mádı Menaıdarov esimdi jas akter oınaıdy. Basty rólderdiń birine japondyq akter Mıraı Morııama shaqyrylǵan.
Halyqaralyq Shanhaı kınofestıvali 1993 jyldan bastap ótedi. 27 jyl ishinde bul shara Qytaı kınoındýstrııasynyń damýynyń kýási boldy jáne mádenı pikir almasý men yntymaqtastyqtyń halyqaralyq alańyna aınalyp úlgerdi.
