Qaqtyǵys
(konflıkt)
Ómir – tolassyz qaıtalanýlar men sheńber boıyndaǵy máńgilik qozǵalys. Toqtaýǵa mejelep qoıǵan núkteń joq. Quladyń bitti, ózgelerdiń aıaqtarynyń astyna taptaldyń! Bizdiń tirligimizde jasap júrgen bir qalypty qozǵalysymyzdaǵy qaqtyǵystardy sýretker «dramatızmge» jetkizedi. Pesa - adamdardy dramalyq áreketterge qatystyrý arqyly, olardyń minez-qulyqtaryn ashýdy, ómirlik ustanymdaryn (avtorlyq pozıııa) jetkizýdi maqsat tutady. Dramalyq árekettiń neden týyndap, nege ákep soqqandyǵynyń barlyǵyn qaqtyǵys arqyly anyqtaımyz. Keıipkerlerdiń «is-áreketi» men «minez-qulyqtary» da qaqtyǵysqa baılanysty, ómirdegiden ózgeshe ekpin-yrqaqpen damıdy. Bireýdiń dramalyq halin baıqaý degenimiz: qaqtyǵysty baıqaý jáne sol qaqtyǵysqa sezim-tebirenisterimizdi bildirip áreket etý. Sondyqtan dramatýrgııanyń eń basty sharty – QAQTYǴYS (keıde tartys retinde de qarastyryp júrmiz.) ekenin umytpaǵanymyz abzal. Qur qaqtyǵystyń ózi de drama bola almaıdy. Qaqtyǵys adamnyń ishki-syrtqy ózgeris áserlerinen bolatyn «jan-dúnıesiniń shıryǵýy». Shyńǵyrýy. Dramalyq sıtýaııany kórý degenimiz ondaǵy qaqtyǵystyń elementterin kórý jáne solarǵa degen ózińniń kózqarasyńdy (qýanysh, renish, qarsylyq, qoldaý,t.b.) bildirý. K.S.Stanıslavskıı: «Drama – avtordyń túsiniktemelerin (remarkalaryn) jáne keıipkerlerdiń ózara qaqtyǵystaryn beıneleý. ...Sóz áreketteriniń úzilmes legi» - dep anyqtama beredi. Qaqtyǵys - ótip jatqan oqıǵaǵa, is-áreketke, aıtylǵan pikirlerge keıipkerlerdiń ártúrli kózqarasynan týyndaıdy. Ár adamnyń ómirtanymy, talǵamy, kózdegen maqsat-múddesi san túrli bolǵandyqtan, qarapaıym zatqa da ártúli pikir qalyptasady. Top-top bolyp óz degenderin dáleldeýge tyrysady. «Ólispeı berispeıtin» tartysqa túsedi. Bul daý-damaı toptardyń arasynda ǵana emes, adamdy óz-ózimen (ishki jan-dúnıesindegi) dramalyq qaqtyǵysqa túsirip, arpalystyryp qoıatynyn jaqsy bilemiz.
Qaqtyǵys - adamzat tirshiliginiń bir kórinisi. Onyń negizgi sebebin rýhanı qanaǵatsyzdyqtan qarastyryp júrmiz. Tirshilikte adam ýaqytsha jaǵdaıdan, belgili bir oqıǵadan, daý-janjaldan týyndaǵan qatyǵysqa ushyraıdy. Ondaı qaqtystyń sheshimin adamdardyń aralasýymen, bolmasa óziniń is-áreketimen taýyp jatady. Bul qaqtyǵystardyń kóbine syrttaı nyshandary basym bolady. Jaǵdaıdyń bıliginen týyndaǵan qaqtyǵystar kórkem ádebıet pen óner týyndylarynyń barlyǵynda kórinis taýyp keledi. «Qozy kórpesh-Baıan sulý» pesasyndaǵy qaqtyǵysty alyp qarańyz. Qarabaıdyń Baıandy Qozyǵa emes, Qodarǵa bermek bolýynan týyndap otyr. Kerisinshe Qarabaı rızalyǵyn bildirgende bul is oń sheshimin tabar edi. Olaı bolmaı aqyry eki ǵashyq ólip, basqasha sheshim taýyp qaıǵymen aıaqtaldy. Qaqtyǵys bitti. Al, ekinshi bir sheshimi tabylmaıtyn qaqtyǵystarǵa da kezdesip jatamyz. Ol negizinen rýhanı qaqtyǵystar. Onyń sheshimi tarıhı, ne bolmasa tabıǵı ózgeristerdiń enshisinde bolady. As.Súleımenov pesalaryndaǵy qaqtyǵystardyń túpqazyǵy «ıdealdyń kúıreýinde» jatyr. «Úshtaǵan» drama dıalogtaryndaǵy úlken ózgerissiz sheshimin taptyrmas qaqtyǵystar: «halyqtyq memlekettiń» - sybaılastardyń bıligine, qoǵamdyq júıeniń - jemqorlardyń jutqynshaǵyna aınalǵandyǵynda jatyr. Qarsylasyp qaýqar tanytqanymen jeke tulǵanyń «júıege» shamasy kelmeıdi. Kónbese ózi qurban bolady nemese amalsyzdan kónip, ishten tynady. Bul qoǵamdyq júıe bar da bolatyn máńgilik qaqtyǵys. Qarabaıdyń jan-dúnıesinde jatqan asa qaýipti qaqtyǵystyń bary ras. Ol Sarybaıdyń ólimine baılanysty ony ishten tynýǵa májbúr etken qaqtyǵysy. Bul onyń jeke basynyń máńgilik qatyǵysy. Odan ol «ólip te qutyla almaq» emes. Ózge mysal keltirer bolsaq qoǵamdyq júıe men áleýmettik teńsizdikterden týatyn rýhanı qaqtyǵystardyń sheshimin tarıhı ózgerister ǵana sheshýi múmkin. Onyń ózinde túbegeıli sheshedi deý qıyn. Adamdar óz taǵdyrynyń paıdaly sheshimi úshin, ózgelerdiń taǵdyryna qııanat jasamaı tura almaıdy. Demek, bir qaqtyǵystyń saldary kelesi bir jańa qaqtyǵystyń sebebine aınalatynyn baıqaımyz. Rýhanı qaqtyǵystyń adam mineziniń qalyptasýyna tikeleı áser etetinin umytpaýymyz kerek: kemtar adam, tuıyq adam, zarjaq adam, zymııan adam, t.t. Bul ataýlardyń belgili bir ishki sebebi týdyrǵan, syrt dúnıemen qaqtyǵysy bar. Olardyń minez-qulqynan «týyndaǵan» áreketteri sol qaqtyǵystyń syrtqy kórinisi. Osy bir adamdardyń «minezderindegi erekshelik» birtindep olar úshin syrtqy kúshterden qorǵanýdyń tásiline aınalyp ketedi.
Psıhologııalyq realızmniń ókili, aǵylshyndyq jazýshy Edvard Forster ( 1879 – 1970 ): «Patsha ólip, artynan patshaıym óldi desek, bul tarıh. Jaı ǵana sıýjet. Al, egerde: Patsha ólip, artynan patshaıym qaıǵydan óldi desek, bul endi drama» – deıdi. Olaı bolatyny qaıǵyda qaqtyǵysty týdyratyn sebepter (faktiler) jatyr. Dramalyq qaqtyǵystyń sharyqtaýy qaıshylyqtardy týdyratyn sebepterdiń tolassyz týyndaýyna tikeleı baılanysty ekeni aıtpasa da belgili. Osyny kóptegen avtorlar eskere bermeıdi. E.Forster aıtqan oıdyń aldyńǵy shartyn oryndaǵanymen, sońǵy sharttyń sheshýin qarastyrmaıdy. Nege?.. Qalaı?.. Qandaı jaǵdaıda?.. degen suraqtarǵa jaýap izdestirmeıdi. Sondyqtan birtalaıynyń jazǵandary ınformaııa deńgeıinen aspaı qalyp jatatynyn jıi baıqaımyz. Pesaǵa arqaý etip alǵan ómirdegi keleli máselelerdi (problemalardy), keıipkerler arasyndaǵy «bitispes tartystar», «ymyraǵa kelmes qaqtyǵystar» turǵysynan qarastyrýymyz shart. Dramatýrg úshin qaqtyǵys - pesa jazýdyń tehnologııasy emes, aqıqat pen bolmysqa (deıstvıtelnost), qoǵamdyq qaıshylyqtar men tarıhı aǵymdarǵa degen kózqarasy.
Amerıkandyq aqyn, esseshi, estet Djordj Santaıan (1863 – 1952 ) : «Romanıst-jazýshy ómirdegi oqıǵalardy adamdardyń sana-seziminiń prızmasy arqyly kórse, dramatýrg adamdardyń sana-sezimin ómirdegi oqıǵalardyń prızmasy arqyly kóredi» - deıdi. Bylaısha aıtqanda jazýshy ómirdegi oqıǵalarǵa keıipkerlerdiń oı-pikiri, is-áreketimen qarasa, dramatýrg keıipkerleriniń oı-pikiri men is-áreketiniń sebepterin ómirdegi oqıǵalardyń saldary retinde qarastyrady. Demek, drama óneri - ómirdegi ózgerister men qoǵamdaǵy qubylystardyń adamdarǵa jáne olardyń sana-sezimine, is-áreketine tıgizer yqpalyn ashyp kórsetýi qajet. Dramatýrgııanyń adam delebesin qozdyryp qyzyqtyrar qudireti: «endi ne bolar eken?» -degizip, taǵatyn taýysyp kúttirýinde. Kúdik pen kúmánǵa toly «qupııany» kórinisten kóriniske shırata otyryp, pesanyń sońyna deıin kórermenniń qushtarlyǵyn joǵaltpaı alyp barýynda! Sahnalyq ómir – oı eńbeginiń jemisi. Al, keıipker: aldymen dramalyq is-áreketti júzege asyrýshy, odan keıin baryp - tulǵa (jaǵymdy nemese jaǵymsyz, t.s.).
Eger drama – tótenshe jaǵdaılardy kórkemdep jetkizer ónerdiń túri bolǵanda, sıýjet – sýretkerdiń qaqtyǵystardy kórseter quraly. Fabýla – oqıǵalar leginiń jalań qozǵalysy. Sıýjet – avtordyń oqıǵalarǵa degen azamattyq kózqarasyn keıipkerler arqyly berýi. Qaqtyǵystyń qısyndy túrde damýy. Sezim tebirenisterimizdiń tasqyny. M.Áýezov, Ǵ.Músirepovter dramalaryna epostar ( «Qara qypshaq – Qobylandy», «Qozy kórpesh – Baıan sulý», «Qyz – Jibek» ) men ózge avtorlardyń shyǵarmalaryn ( Shákárim Qudaıberdıev. «Eńlik – Kebek» ) arqaý etkende, keıipkerlerdiń ara-qatynasyn qaıta qarastyryp, qaqtyǵysty da túpnusqadan ózgeshe qurady. Sondaǵy oqıǵalarǵa basqasha talap deńgeıinen qarap, baǵa beredi. Tar aýqymnan shyǵyp, halyqtyq tragedııa deńgeıine kóteredi. Bul olardyń M.Gorkıı aıtqan: «ádebıettiń eń qıyn janry» dramany keremetteı meńgergeniniń aıǵaǵy. Dramatýrgtyń jeńisi men jeńilisi - pesanyń keleli máselelerdi kótere bilýinde ǵana emes, sol pesany qoıatyn teatr ujymynyń shyǵarmashylyq izdenisterine, sýretkerlik pozıııasyna da táýeldi bolady. Muqań men Ǵabeńderdiń tabysty eńbek etýleri teatrmen tyǵyz baılanysta bolǵandyǵynda jatyr. Pesalarynyń kóbi teatrda jazyldy. Ózderi, rejısserler men akterlardan úırenýge, óz bilgenderin úıretýge belsene aralasty. Repetıııalarda otyryp kemshilikterin túzep, tolyqtyryp, qaıtadan jazyp ter tókti.
Jaqsy dramatýrgııa túrli janrlardyń jıyntyǵy bolýy kerek. Ómirdiń ózinde kúlki menen kóz jasy, qaıǵysy menen qýanyshy qatar júrmeı me!?. «Qaragózdegi» kelinshekter men tabaqshylar, «Eńlik – Kebektegi » Japal, «Aqan seri – Aqtoqtydaǵy» Qońqaıdyń kórinisterin kúlkige kómile otyryp kórgenińizben, qanshama oryndalmaıtyn arman, janqaıǵysy jatqanyn sezesiz. Al, Chehovtyń pesalary she! Komedııa dep jazylǵan pesalardan drama , tipti keıde tragedııalyq qoıylymdar kórip jatamyz?!. Múmkin Anton Pavlovıch ol dramalarǵa kúlkimen, ıronııamen, basqasha kózqaraspen, múlde basqa uǵymmen qaraǵan bolar? Shyǵarmalarynyń qatparlarynan A.P.Chehov meńzegen «shyndyqty» baıqamaǵan shyǵarmyz? B.Maılınnyń pesalary da tereń, astarly, qupııa qazyna emes pe! Sovettik zobalańdy satıra sadaǵyna túıregen de ózge emes, osy ózimizdiń Beıimbettiń shyǵarmalary emes pe edi?!
